WBC yangilangan reytingida katta o'zgarishlar. O'zbekistonlik bokschi ikkinchi rasmiy da'vogarga aylandi

Butunjahon boks kengashi (WBC) oktyabr oyi uchun professional bokschilarning yangi reytingini e'lon qildi. Unga ko'ra, o'zbekistonlik etti nafar bokschi mazkur reytingdan o'rin egalladi. Bu haqda GoSport.uz internet-nashri muxbiri xabar bermoqda.

Ahamiyatli tomoni, super o'rta (-76,2 kg) vazn toifasida ringga ko'tarilayotgan o'zbekistonlik Azizbek Abdug'ofurov (13-0, 5 KO) yangi reytingda bir oy oldingi pog'onasidan ikki pog'ona yuqorilab 2-o'ringa ko'tarildi. U hamon WBC Silver kamari sohibi sifatida ko'rsatilmoqda. WBC mazkur reyting etakchisi turkiyalik Avni Yildirimni (21-2, 12 KO) chempionlik kamari uchun rasmiy da'vogar sifatida e'lon qildi va chempion David Benavides (22-0, 19 KO) bilan tez orada jang o'tkazishi bo'yicha buyurtma berildi. Aynan mana shu jangdan so'ng Azizbek Abdug'ofurov chempionlik uchun birinchi raqamli majburiy da'vogarga aylanadi.

Yarim o'rta (-66,68 kg) vazn toifasi vakili Qudratillo Abduqahhorov (17-0, 9 KO) esa reytingda bir oy oldingi o'rnini saqlab qolgan holda 5-o'rinda bormoqda. Ayni vaqtda u IBF reytingida birinchi, WBO reytingida esa 11-o'rinlarni egallab turibdi.

Reytingning xalqaro miqyosida tan olingan Top-15 ligida boshqa o'zbekistonlik bokschilar joy olmagan. Ammo WBC boshqa reytinglardan farqli ravishda 40 kishidan iborat reytingni tuzib chiqadi. Mazkur kengaytirilgan reytingda yana besh nafar o'zbek bokschisi e'tirof etilgan.

WBC kengaytirilgan reytingidan super engil (-63,5 kg) vazn toifasida ringga chiqayotgan Shahram G'iyosov (9-0, 7 KO) yana bir pog'ona yuqorilab 22-o'rinda qayd qilingan. Ushbu vazn toifasining yana bir vakili Shohjahon Ergashev (17-0, 15 KO) ham bita o'rin ko'tarilib, 28-pog'onani band etib turibdi. Mazkur vaznning yana bir vakili WBC Asia chempionlik kamari sohibi Anvar Turopov esa (5-1, 4 KO) bir pog'ona pastlab 39-o'rinda qayd qilingan.

Shuningdek, yangilangan reytingda super yarim o'rta (-69,85 kg) vazn toifasida ringga chiqayotgan Isroil Madrimov (4-0, 4 KO) o'tgan oydagi bir yo'la 9 pog'ona yuqorilashdan so'ng bu safar uch pog'ona pastlab 34-o'rindan joy olgan. O'ta og'ir (+90,7 kg) vazn toifasi vakili Bahodir Jalolov (6-0, 6 KO) 39-o'rinni saqlab qolgan.