«Chempion bo'lmoqchimisan? Hamma ishni chempionlarga o'xshab bajar!»

Bugun uzoq kutilgan Osiyo Kubogi boshlanadi. Va nihoyat! Katta musobaqa muhitini rostakamiga his qilamiz. Bizning o'yinimiz boshlanishiga hali bir necha kun bor. Lekin hozirdanoq barcha futbolchi va murabbiylarning ko'zida jiddiy mas'uliyat ko'ryapman. 

Kuper ko'p vaqtini mehmonxona lobbisida yordamchilari bilan nimalarnidir tahlil qilib o'tkazmoqda. Oldilarida allaqancha qog'ozlar, noutbuk. Ba'zan soatlab o'tirishadi. Mashg'ulotlar uchun reja tuzishadi. Mashg'ulot paytida esa yordamchilaridan tashqari Kuperning o'zi ham ancha faol ishtirok etadi. Kerak bo'lsa futbolchilar bilan birga yuguradi, sakraydi, to'p tepadi. Shunisiga qoyil qoldim. Umuman olganda, Kuperni bir ajoyib jihati bor ekan. O'zini jamoadan alohida tutmaydi. Masalan, samolyotda uchayotganda bizness-klass chiptalarini rad qilib, futbolchilar bilan birga ekonom klassda uchishni ma'qul ko'radi. Mehmonxonalarda ham o'zi uchun futbolchilardan alohida sharoitlar yaratilishini talab qilmaydi. Ovqat payti futbolchilar nima esa shundan tanovul qiladi. O'zini jamoaning boshlig'i emas, bir bo'lagi sifatida his qiladi. 

Bugungi mashg'ulotlarda ham “Mister” ancha faol ishtirok etdi. Darvoqe, mashg'ulotdan avval bugun tug'ilgan kunini nishonlayotgan O'tkir Yusupov uchun “jonli yo'lak” hosil qilindi va u “futbolchilarga xos tarzda” tabriklandi. Nimani nazarda tutayotganimni ashaddiy futbol muxlislari tushunishdi, deb o'ylayman. 


Shuningdek, bunday “tabriklash”dan yaqindagina tug'ilgan kunini nishonlagan Fozil Musaev va Marat Bikmaevlar ham “quruq” qolishmadi. Bu jarayon mashg'ulotdan avval futbolchilarning kayfiyatini ancha ko'tardi.



Lekin mashg'ulotlar ancha jiddiy o'tdi. Barcha astoyidil mehnat qildi. Keyin kechqurun mehmonxonada yig'ilish o'tkazdik. Kuperdan tortib jamoa administratorlarigacha barcha qatnashdi. Futbolchilarga musobaqa oldidan ruhlantiruvchi so'zlar aytildi. Biz bir jamoa ekanligimiz, bir jamoa sifatida harakat qilishimiz zarurligi, g'alaba qozonish uchun barcha o'z hissasini qo'shishi zarurligi uqtirildi. 

Menga ushbu tadbirda yangragan bir ibora juda yoqdi: “Chempion bo'lmoqchimisan? Barcha ishni chempionlarga xos tarzda bajar!” Futbolda mayda narsalar bo'lmaydi, deb ko'p aytamiz. Har bir jihat muhim, har bir jihatga jiddiy e'tibor qaratish zarur. Nafaqat futbolchilar, jamoadagi barcha – murabbiydan tortib shifokorgacha, menejerdan tortib administratorgacha o'z ishini professional tarzda, chempionlarga xos ravishda bajarishi kerak.

Shundagina biz chempionlikka erishamiz! Yo'q, erishmaymiz, ChEMPIONLARGA AYLANAMIZ!