Tachmurod Agamurodov: «Futbolchilar mag'lubiyatlar sabab bosimdan chiqa olishmayapti...»

“So'g'diyona” – “Dinamo” uchrashuvidan keyingi matbuot anjumanida dastlab Samarqand jamoasi bosh murabbiyi Tachmurod Agamurodov o'yin borasida fikr bildirdi.

"Jamoamizning bugungi o'yinidan aslo qoniqmadim. Maydonda hech bir harakatimiz natijali bo'lgani yo'q. Jamoa ketma-ket mag'lubiyatlar sababli kuchli bosimdan qutila olmayapti. Omadsizliklar jamoa ruhiyatiga salbiy ta'sir qilishi aniq. Shu bois maydonda ham yigitlar o'zlarini ko'rsata olishmayapgan bo'lishlari mumkin. Birinchi bo'limda durang qayd etilgan bo'lsa-da, ikki taymda ham o'yinimizning darajasidan umuman qoniqmadim. Jamoaning ligada tushib ketish xavfi ostida ekanligi bosim ostida qoldirmoqda. Qolaversa, “Dinamo”da tajriba etishmayotgani ko'rinib turibdi. Raqib jamoani bugungi g'alaba bilan tabriklayman. “So'g'diyona” bejizga 3-o'rin uchun kurashmayotganligini ko'rsatdi.

Imkoniyat qoldimi? Ha, imkoniyat so'nggi turlargacha bo'ladi. Ammo biz kurashib, ochkolarni olishimiz shart. Uchta tur qoldi, oxirigacha kurashamiz", - dedi Tachmurod Shamakovich.