A seriya. Ronaldusiz o'ynagan «Yuventus» ochko yo'qotdi (videosharh)

Italiya chempionatining 9-turi doirasida «Lechche» o'z uyida mavsum peshqadami «Yuventus»ni qabul qilib, bir ochkoni qo'lga kiritdi.

Maurisio Sarri shogirdlari juda ko'p vaziyatlar yaratganini inobatga olsak, turinliklar bugun 2 ochko yo'qotishdi. Mehmonlarning bir qator urinishlari 15-daqiqada samara bergan edi. Ammo darvozani ishg'ol qilgan Iguain ofsaydda qolgan ekan. Tanaffusga qadar "keksa sinora" faqatgina omadsizlik yoki "Lechche" posbonning ajoyib harakatlari evaziga hisobni ocha olmadi.

Ikkinchi bo'lim boshida esa hakam mehmonlar darvozasi tomon penalti belgiladi, VAR yordamida o'z qarorining to'g'riligini tekshirib oldi. Dibala 11 metrli jarima zarbasini golga aylantirdi.

Oradan ko'p o'tmasdan "Lechche" futbolchisi Mankozu dastlab ajoyib zarba bilan darvozaning yaqin "to'qqizligi" tomon zarba berdi. Shchesni mahorat bilan to'pni maydon tashqarisiga chiqarib yubordi. Burchakdan etkazilgan uzatmani qaytarish chog'ida Matteys de Ligt to'pni qo'li bilan o'ynadi. Belgilangan penaltini Marko Mankozuning o'zi golga aylantirib, hisobni tenglashtirdi.

Uchrashuvning 62-daqiqasida Bernardeskining zarbasidan keyin to'p ustunga tegib qaytdi.

Qolgan daqiqalarda "Lechche" futbolchilari yaxshi himoyalanib, durang natijani saqlab qolishdi.

Bugungi ochko tufayli "Yuventus"ning ochkolari 23taga etkazib oldi. "Inter" bugun "Parma"ni mag'lub etsa, jadvalda 1-o'ringa ko'tarilib olishi mumkin.

Italiya chempionati, 9-tur
Lechche – Yuventus 1:1 (0:0, 1:1)
Gollar: 0:1 – 50, penalti Dibala, 1:1 – 56, penalti Mankozu.
Lechche – Gabriel, Rossettini, Luchoni, Kalderoni, Mekkarello (Rispoli, 72), Taxtsidis, Petrichchone, Mankozu, Maer (Tabanelli, 58), Farias (Lapadula, 46), El-Babakar.
Yuventus – Shchensnii, de Ligt, Aleks Sandro, Danilo (Kuadrado, 58), Bonuchchi, Djan (Rabo, 72), Pyanich (Xedira, 67), Bentankur, Bernardeski, Dibala, Iguain.
Ogohlantirishlar: Kalderoni (13), Rossettini (18), Mankozu (75), Bernardeski (79), Lapadula (87).