O'FA vakillari Surxondaryoda futbol ob'ektlarini ko'zdan kechirishdi
/ Kiritdi: BestMaster Ko'rilgan: 332
O'FA mutaxassislar guruhi respublikamizdagi futbol akademiyalari, infratuzilma, bolalar va o'smirlar futboli hamda ommaviy futbolga qaratilayotgan e'tiborni o'rganib chiqishmoqda.
Asosiy maqsad ushbu yo'nalishlar bo'yicha holatni faqatgina qog'ozda yoki raqamlarda emas, balki bevosita joyiga, chekka xududlar, qishloqlarga borib o'rganib chiqish hamda tegishli choralarni ko'rishdan iborat. Aynan shu niyatda O'FA birinchi vitse-prezidenti Ravshan Ermatov va mas'ul mutaxassislar Surxondaryoda bo'lishdi. Ushbu vohada o'zbek futbolining ko'plab yulduzlari etishib chiqqan. Ularni tarbiyalab bergan futbol maktablari, akademiyalar, jamoalar faoliyati o'rganib chiqildi.
Xususan, Termiz tumanidagi futbol akademiyasi, Termiz olimpiya zaxiralari sport maktabi, Jo'raqo'rg'on tumanidagi BO'SM faoliyati ko'zdan kechirildi va futbol sektsiyalari darajasini oshirish va rivojlantirish rejasi tuzildi. Bugungi kunda o'zbek futbol yulduzi bo'lmish Eldor Shomurodov ham aynan Jarqo'rg'on tumanida voyaga etganini va futbolimiz mutasaddilari terma jamoamiz a'zosi xonadonida bo'lib, oila a'zolari bilan uchrashishdi.
Shuningdek, Denov tumanida ham futbol maktabi barpo etish bo'yicha sport kolleji hududi ko'rib chiqildi. O'FA vakillari Surxondaryo futbol assotsiatsiyasida ham bo'lishdi va viloyat futboli borasidagi vaziyatni to'liq o'rganib chiqishdi. Shuningdek, futbolni rivojlantirish rejalarini muhokama qilish maqsadida Ravshan Ermatov Surxondaryo viloyati hokimi To'ra Abdievich Bobolov bilan uchrashdi va xududda futbolni yangi darajaga olib chiqish borasida fikr almashishdi.