Abramovning terma jamoga murabbiy bo'lgani «Bunyodkor»ning o'yiniga ta'sir o'tkazdimi? Qosimov javob berdi

Superliganing 22-turidan o'rin olgan “Bunyodkor” hamda  AGMK jamoalari o'rtasidagi o'yin yakunlandi. O'yindan so'ng matbuot anjumanining birinchi qismida AGMK bosh murabbiyi Mirjalol Qosimov jurnalistlar savollariga javob qaytardi.

“Bir gapni qaytarishni hech kim xohlamaydi. Ko'rdingiz o'yin kutilganidan kech yakunlandi. Bu vaqtda hozir biz uyda bo'lishimiz kerak edi. Keling kamroq gapiramiz.

Darvoza chizig'idagi raqobat? Bizda 3ta kuchli darvozabonlar bor. Mavsum boshidan buyon ularning har biriga imkoniyat berdik. Sultonov hozirda optimal formada.

To'g'ri, mavsum boshida biroz o'yinlarimiz o'xshamadi. Sababi yangi joyga moslashish oson emas. Umuman har qanday sohada shunday. Yil boshida juda ko'p xatolar qimmatga tushdi. Oddiy vaziyatlardagi xatolar, darvozabonlardan boshlab, hujumchilarga qadar beqaror ko'ringandi. Umuman futbolda omad degan tushuncha kerak. Ba'zi vaziyatlarda esa omad kulib boqmadi. Yangi jamoani qurish uchun esa vaqt kerak. Hozirgi paytda futbolchilar yomon harakat qilishmayapti. Umuman futbolni yuqori ishtiyoq bilan o'ynash kerak. Shundagina nimagadir erishish mumkin.

Abramovning terma jamoaga bosh murabbiy bo'lgani "Bunyodkor" o'yiniga ta'sir qildimi? Yo'q, men unday deb o'ylamayman. Tashqaridan hamma narsa oson ko'rinadi. Baribir buni ichkarida his qilgan boshqa. Shu boisdan bu haqida biror narsa deyish qiyin. Abramov boshchiligidagi terma jamoamizga omad tilayman”, -deya Qosimov so'zlarini keltiradi Stadion.uzjurnalisti Jaloliddin Qobiljonov.