Andijon bolalar-o'smirlar futbol akademiyasi tarbiyalanuvchilari O'zbekistonda tengsiz

O'zbekiston futbol assotsiatsiyasi huzuridagi hududiy bolalar-o'smirlar futbol akademiyalarining 2004 yilda tug'ilgan tarbiyalanuvchilari o'rtasida o'tkazilayotgan O'zbekiston chempionati g'olib va sovrindorlari aniqlandi.

Xabar berganimizdek, musobaqaning ilk bosqichida jamoalar “A” va “B” mintaqasiga bo'lingan holda, uy-safar tizimida o'tkazilgan uchrashuvlar yakuniga ko'ra U-14, U-15, U-16, U-17 yosh toifalarida 8tadan jami 32 ta eng kuchli jamoa saralab olindi hamda ular musobaqaning ikkinchi bosqich yo'llanmasini qo'lga kiritishgan edi.

2004 yil tarbiyalanuvchilari o'rtasida o'tkazilgan musobaqaning hal qiluvchi final uchrashuvida Sirdaryo hamda Andijon viloyati bolalar-o'smirlar futbol akademiyalarining tarbiyalanuvchilari to'qnash kelishdi. Qizg'in va murosasiz o'tgan final bahsida Andijon viloyati yosh futbolchilari kichik – 1:0 hisobida g'alaba qozonishdi.

Final

Sirdaryo BO'FA 0:1 Andijon BO'FA

Gol: Bobur Qodirov (30)

3-o'rinni Qashqadaryo hamda Farg'ona viloyat bolalar-o'smirlar futbol akademiyalari tarbiyalanuvchilari qo'lga kiritdi.

Musobaqaning yopilish marosimida g'olib va sovrindor jamoalar, shuningdek turli nominatsiyalarda eng yaxshi deb topilgan futbolchilar O'zbekiston futbol assotsiatsiyasi terma jamoalar bo'limi boshlig'i Azizbek Xaydarov, O'zbekiston o'smirlar terma jamoasi bosh murabbiyi Azamat Abduraimov hamda Futbol akademiyalarini rivojlantirish bo'limi boshlig'i Ongarbay Djalimovlar tomonidan medal, diplom, kubok va esdalik sovg'alari bilan taqdirlanishdi.

Nominatsiyalar bo'yicha eng yaxshilar:

Eng yaxshi darvozabon – Abdumalik Nurmuhammadov (Andijon viloyati)

Musobaqa to'purari – Azamat Tolibjonov (Farg'ona viloyati)

Eng yaxshi o'yinchi –Mirxaid Xoldorov (Sirdaryo viloyati)

Joriy yilning 15-19 oktyabr kunlari “Bunyodkor” futbol akademiyasida 2003 yilda tug'ilgan tarbiyalanuvchilar musobaqani davom ettirishadi.