MOQda o'q otish sporti va og'ir atletika federatsiyalarining hisoboti tinglandi

O'zbekiston terma jamoasi vakillarini kelasi yili bo'lib o'tadigan Tokio Olimpiadasiga puxta tayyorlash yuzasidan har bir federatsiya va assotsiatsiyalarning hisoboti tinglanmoqda. Bugun Milliy olimpiya qo'mitasida O'zbekiston o'q otish sporti va og'ir atletika federatsiyalarining Olimpiya o'yinlariga olib borayotgan tayyorgarligi yuzasidan hisoboti tinglandi. Federatsiya mutasaddilarining hisobotini shaxsan MOQ rahbari Rustam Shoabdurahmonov qabul qildi.

O'q otish sporti bo'yicha vakillarimizning qo'lga kiritishi mumkin bo'lgan litsenziyalari shu yilning o'zida aniq bo'ladi. Noyabr oyida Qatar poytaxtida o'tadigan Osiyo chempionati Tokio Olimpiadasiga vakillarimiz litsenziya qo'lga kiritishi mumkin bo'lgan so'nggi litsenzion musobaqa hisoblanadi. Shu bois ushbu turnirga vakillarimizni yuqori saviyada tayyorlash talab etilmoqda. Suhbat davomida merganlarimizning mashg'ulotdagi ko'rsatkichlari mazkur Osiyo chempionatida qanday natija berishi mumkinligi borasida chuqur va atroflicha muhokama qilib borildi.

Shuningdek, O'zbekiston og'ir atletika federatsiyasining birinchi o'rinbosari Shahrullo Mahmudov boshchiligidagi delegatsiya ham og'ir atletika bo'yicha federatsiyada olib borilayotgan ishlar, sportchilarimizning natijalari bo'yicha o'z tahlillarini o'qib eshittirdi. Reglamentga ko'ra, og'ir atletika sportida Olimpiada yo'llanmalari reyting asosida taqsimlanadi, shuningdek, jahon chempionatida kuchli sakkiztalikdan joy olgan sportchilar Tokio Olimpiadasi yo'llanmasini naqd qilishi mumkin. Xalqaro og'ir atletika federatsiyasi esa terma jamoalarga chegaralangan kvotalar taqdim qilgan. Bu borada hamyurtlarimizga maksimum 4 ta litsenziya ajratilgan. Pattayyada 3 nafar vakilimiz shohsupaga ko'tarilganidan xabaringiz bor. Bu bilan ularda yo'llanma naqd ham deyish mumkin. Ammo kelasi yilning Aprel oyi so'ngida e'lon qilinadigan reyting jadvali bo'yicha yana boshqa sportchilarimiz ham litsenzion yo'llanmani qo'lga kiritish ehtimollari ham yo'q emas.

Suhbat davomida ajratilgan yana bir yo'llanmaga da'vogar sportchilarimizning reytingdagi holati, qolaversa, jahon chempionati sovrindorlarining keyingi musobaqalarga tayyorgarlik bosqichlari xususida ishlab chiqilgan dastur muhokama qilindi.