Hasanboy Do'smatovning debyut jang sanasi ma'lum, u Shahram G'iyosov bilan bitta boks oqshomida jang qiladi

Professional boksning birinchi o'ta engil (-48,99 kg) vazn toifasida faoliyatini boshlayotgan Hasanboy Do'smatov noyabr oyining so'nggi kunida professional boksdagi debyut jangini o'tkazadi. Bu haqda GoSport.uz internet-nashri manbalari xabar bermoqda.

Ma'lumotlarga ko'ra, Do'smatov 30 noyabr kuni Monako poytaxti Monte-Karlo shahrida joylashgan kazino markazida bo'lib o'tadigan boks kechasida ringga ko'tariladi. E'tiborli tomoni shu kuni Do'smatov bilan birga super engil (-63,5 kg) vazn toifasida ringga chiqayotgan Shahram G'iyosov (9-0, 7 KO) ham ringga ko'tariladi.

Hozircha ikkala bokschining ham raqibi kim bo'lishi ma'lum emas. Oldinroq, Do'smatov birinchi jangidayoq jahon chempionlik kamari uchun ringga chiqishi mumkinligi xabar berilgandi.

Mazkur boks oqshomining markaziy jangida rossiyalik Aleksandr Besputin (13-0, 9 KO) hamyurti Rajab Butaevga (12-0, 9 KO) qarshi yarim o'rta (-66,68 kg) vazn toifasining WBA jahon chempionlik kamari uchun ringga ko'tariladi.