Oqsoq iblislar: “Manchester Yunayted”ning so'roq ostidagi kelajagi

O'tgan mavsumda boshlangan shirin ertak o'tgan mavsumdayoq tugadi: Ule-Gunnar Sulsher “Manchester Yunayted” xaloskori, “qotil chaqaloq” kabi laqablaridan ayrildi. Bugun Sulsher ham “MYu”ning oldingi murabbiylarining holatiga tushib qolgan deyarli.  Yana bitta autsayderdan uchralgan mag'lubiyat, masalan, Evropa Ligasida guruh bosqichidagi sharmandali mag'lubiyatning o'zi shotlandiyalik mutaxassisning iste'fosiga sabab bo'lishi mumkin.

Sulsherning intervyularidan birida aytgan gapi e'tiborimni tortgandi: “Manchester Yunayted” hech qachon top futbolchi sotib olmagan. Futbolchilar “MYu”da yulduzga aylanadi”. Nazarimda, Sulsher omadsizliklarni top futbolchilar sotib olinmagani bilan izohlagandek tuyildi. Ammo jamoani uzoq yil boshqargan Ser Aleks Fergyuson ham deyarli top darajadagi futbolchi xarid qilmagan. Ammo “Manchester Yunayted” bilan qanday yutuqlarni qo'lga kiritganligini bilasiz.

Sulsherning “Manchester Yunayted”ni boshqarishdagi omadsizligi tajribasi, darajasi bilan bog'liq. Uning tajribasi kamligi APLda o'z o'rnini topishga xalal berayotgan bo'lsa, darajasi sustligi jamoada o'z o'rnini topishiga imkon bermayapti. “Manchester Yunayted”da Pogba kabi futbolchilar borki, o'zining ta'biri bilan aytganda “qaerdandir kelib qolgan murabbiy”dan o'zini ustun qo'yadi. Bunday holatda, jamoada bosh murabbiyning o'rni bo'lmagan holatda esa ijobiy natija kutish juda qiyin.

Alohida ta'kidlash kerakki, Sulsher bisotidagi bor taktikani qo'llab ko'rgandek nazarimizda. Bu yog'iga jarohatdan qutulayotgan futbolchilar hamda tarkibdagi futbolchilarning faolroq o'ynashiga umid qilyapti. Eng muhimi, hozir Sulsherning miyasidagi o'y “APLda g'olib chiqish va Evropa Ligasida zafar quchish” emas, jamoa tarkibini, barqaror tarkibni shakllantirish. Shu boisdan “qizil iblislar” joriy mavsumni 6-o'rinda yakunlasa ham ajablanmagan bo'lardim.

“Manchester Yunayted”ning asosiy kamchiligi — jamoada etakchi futbolchining yo'qligi. Vaholanki, shu paytga qadar, aniqrog'i, Fergyuson davrida jamoada kamida bitta etakchi futbolchi bo'lgan. Ayni damda esa bunday o'yinchi yo'q. Reshford top darajaga chiqishga hamon intilyapti, Marsyal endi-endi ko'proq o'yin amaliyotiga ega bo'lmoqda, De Xea darvozabon, darvozabonlar esa etakchilik qilishni  har doim ham eplayvermaydi, Mataning jamoa a'zosi ekanligini unutib ham yuborayozdik, Matich esa haminqadar o'ynayapti. Xullas, “Tottenxem”da Keyn, “Manchester Siti”da Aguero, Sterling, “Arsenal”da Obameyang, “Liverpul”da Saloh, Mane kabi etakchilar bor, ammo “Manchester Yunayted”da bunday futbolchi hozir yo'q. Sulsher aynan ana shu kamchilikni to'ldirishga intilishi lozim.

Agar Gleyzerlarning maqsadi yangi “Manchester Yunayted”ni shakllantirish, yosh tarkibni shakllantirish bo'lsa, Sulsherga imkoniyat berish kerak. Ammo agar sovrin qo'lga kiritishni istashsa, transferlar uchun kattaroq mablag' sarflash va Sulsherdan tajribaliroq murabbiyni olib kelish lozim. Chunki raqib tomonda Gvardiola, Pochettino kabi tajribali murabbiylar bor. Sulsher esa, baribir, ushbu murabbiylar qarshisida biroz ojizdek ko'rinadi. Baribir, xalqaro maydonda katta sovrinlar uchun kurashib o'rganmagan murabbiydan birdaniga bu ishni talab qilishning o'zi noto'g'ri, aslida.

“Manchester Yunayted”da hozir barqaror asosiy tarkib yo'q. Sulsherning ixtiyorida o'z ishining ustasi bo'lgan 11 nafar futbolchini topish ham qiyin. Boshqa tomondan “MYu”da hozir avlodlar almashinuvi kechmoqda. Yosh futbolchilar o'zini ko'rsatishga intilyapti. Aslida, jamoada azaldan shunday bo'lib kelgan. Faqat Fergyuson bu jarayonni shunday amalga oshirganki, ham avlod almashgan, ham “Manchester Yunayted” sovrinlardan chetda qolib ketmagan. Bugun esa bunday emas va Sulsherni ayblash noto'g'ri. Chunki u Fergyuson bo'lolmaydi. U Sulsher, ayni damda uning bori shu.

Nima qilish lozim? Echimi bir qarashda oddiy, tarkibni tozalab, yangilash kerak. Ketishni istayotgan futbolchilardan qutulish va jamoaga ham tajribali, ham ishtiyoqmand futbolchilarni olib kelish lozim. Birinchi navbatda hujum chizig'ida to'purar futbolchi talab qilinadi. Reshford —  ob-havo, Marsyal ham doim barqaror o'ynamaydi, boshqa hujumchilar ham shu. Ikkinchi navbatda himoyani ham mustahkamlash talab qilinadi. Masalan, Eshli Yang himoyachi emas, aslida. Asosiy tarkibdan tushib qolmaslik uchun bir paytlar himoyani bo'yniga olgan yarim himoyachi. Kris Smolling — vazifasini bajarib bo'lgan askar. Bularning o'rnini kamida Maguayr kabi futbolchilar bilan to'ldirish lozim. Chunki mahsulot sifatli bo'lmasa, sotuvchi qanchalik ustamon bo'lmasin, sifatsizlik pand berib qo'yadi.