Prevyu. “Navbahor” - “Dinamo”

Coca Cola Superliga 21-turi doirasida Namanganning “Navbahor” jamoasi o'z maydonida Samarqandning “Dinamo” klubini qabul qiladi.    

Mazkur jamoalar shu kungacha Superliga (oliy liga) bahslarida 47 marta o'zaro ro'baro' kelishgan. Ushbu o'yinlarda namanganliklar 25, “ko'hna shaharliklar” esa 13 marta zafar quchishgan bo'lsa, 9ta uchrashuvda durang qayd etilgan. To'plar nisbati – 84-43, “Navbahor” foydasiga.

O'zaro o'yinlarda “lochinlar” 84, “arslonlar” esa 48 ochkoni qo'lga kiritishgan.     

Ushbu klublar o'rtasidagi o'yinlarda eng yirik hisob 1996 va 1997 yillari Namanganda qayd etilgan. O'sha mavsumlarda “Navbahor” “Dinamo” ustidan tegishlicha 6:0  hamda 7:1 hisoblarida zafar quchgan.

E'tiborlisi, samarqandliklar shu paytgacha namanganliklarni yirik hisobda mag'lubiyatga uchrata olishmagan.

Mazkur jamoalar shu kungacha Namanganda o'zaro 23ta uchrashuv o'tkazgan. Ushbu o'yinlardan 17 tasida “Navbahor” g'alaba qozongan bo'lsa, yana 6ta bahsda durang qayd etilgan. “Dinamo” hali Namanganda zafar qucha olmagan.   Namanganda bo'lib o'tgan uchrashuvlarda to'plar nisbati -  53-10, jamoamiz foydasiga.

Bu klublarning birinchi davrada Samarqandda kechgan bahsida durang – 2:2 hisobi qayd etilgandi. O'sha o'yinda “Navbahor”ning gollariga Slavko Lukich va Aleksandr Kasyan mualliflik qilishgandi.      

Bo'lajak o'yinda sevimli jamoamizga omad yor bo'lishini tilab qolamiz.        

 “Navbahor“ PFK matbuot xizmati.