Taekvondochilarimiz Rossiya ochiq chempionatini sakkizta medal bilan yakunlashdi

Moskva shahrida taekvondo bo'yicha Rossiya ochiq chempionati o'z yakuniga etdi. Quvonarlisi, ikkinchi kun bellashuvlarida ham terma jamoamiz vakillari 4 ta medal qo'lga kiritishga muvaffaq bo'ldilar.

Nikita Rafalovich -80 kilogramm vazn toifasida barcha raqiblarini mag'lubiyatga uchratib, oltin medalni qo'lga kiritgan bo'lsa, Charos Qayumova (-53 kg) hamda Ozoda Sobirjonova (-57 kg) finalda imkoniyatni boy berib qo'yishdi. Shuningdek, -49 kilogramm vazn toifasida Madinabonu Mannopova bronza medali bilan taqdirlandi.

Eslatib o'tamiz, musobaqaning birinchi kun dasturida terma jamoamiz vakillari 4 ta oltin medalga ega bo'lishgan edi. Shu tariqa, taekvondochilarimiz mazkur turnirda 5 ta oltin, 2 ta kumush va 1 ta bronza medallarini jamg'ardilar.