Suzuvchilarimizdan yana ikki medal, bu gal yigitlarimiz qozog'istonlik suv polochilardan ustun kelishdi

Hindistonning Bangalor shahrida suv sporti turlari bo'yicha turli yosh toifadagi guruhlar o'rtasida o'ninchi Osiyo chempionati davom etadi. Vakillarimiz ushbu musobaqaning har bir kunida shohsupaga ko'tarilib kelishmoqda. Ortqa qolgan navbatdagi kun ham sportchilarimiz uchun muvaffaqiyatli o'tdi.

Suzuvchimiz Xurshidjon Tursunov 100 metrga erkin usulda suzish bo'yicha o'tkazilgan bellashuvda 50,56 soniya natija bilan marraga birinchi bo'lib etib keldi. Shuningdek, yoshlar o'rtasidagi bahslar doirasida Adilbek Yusupbaev 100 metrga chalqancha suzish bellashuvida bronza medali bilan taqdirlandi.

Yana bir e'tiborli tomoni, ayollar jamoasidan so'ng suv polosi bo'yicha erkaklar terma jamoamiz guruh bosqichida qozog'istonlik raqiblariga qarshi bellashuvda 10:9 hisobida ustun kelib, muvaffaqiyatli yurishlarini davom ettirishmoqda. Afsuski, bu turda qizlarimiz bo'lajak Olimpiada mezbonlariga 12:16 hisobida imkoniyatni boy berib qo'yishdi.