Ekaterinburg-2019. Oltin medal Bahodir Jalolovniki!

Ekaterinburgda boks bo'yicha jahon chempionati yakunga etdi. Musobaqada eng so'nggi jang eng og'ir vaznlilar o'rtasidagi o'tkazildi.

Bahodir Jalolov qozog'istonlik Qamshibek Qo'nqabaevga qarshi o'zining eng yaxshi jangini namoyish etdi. Bahodir bo'y va qo'llarining ustunligidan samarali foydalanib, qo'shni mamlakat bokschisini ancha qiyin ahvolga solib qo'ydi.

Bahodirning o'ta kuchli zarbalariga Qo'nqabaev bahs so'ngiga qadar dosh berganiga qoyil qolish kerak. Hakam har bir raundda nokdaunni qayd etib, hisobni ochishi mumkin edi. Ammo referi bu ishga jazm etmadi. Hakamlarning baholari — 5:0 (30:27, 30:27, 30:27, 29:28, 29:28).

Shu tariqa, Bahodir Jalolov Doha-2015 bronza medalidan keyin ilk marta jahon chempionligini qo'lga kiritdi. Hamyurtimiz hisobida ikkita Osiyo chempioni unvoni ham bor.

O'zbekiston terma jamoasi bu yilgi jahon chempionatini 3ta oltin, 1ta kumush va 1ta bronza medali bilan yakunlab, umumjamoa hisobida birinchi o'rinni oldi.