Ekaterinburg-2019. Mirazizbek Mirzaxalilov 3 karra jahon chempionini mag'lub etdi!

Jahon chempionatiga 57 kg. vaznda yo'l olgan Mirazizbek Mirzaxalilov finalda kubalik Lasaro Alvaresga qarshi ringga ko'tarildi.

Farg'onalik bokschi avvalgi janglarida bo'lgani kabi bu safar ham 3 karra jahon chempioniga qarshi tajovuzkor va hujumkor uslubni tanladi. Mirzaxalilov e'tiborni kuchli zarbalarga qaratgan bo'lsa, Lasaro uzun qo'llari orqali qarshi hujumda ishlashga harakat qildi.

Ikkinchi raund tugashiga 37 soniya qolganida hakam o'yinni to'xtatdi. Boisi, Alvaresning yorilgan qoshidan qon oqishi to'xtamadi. Ikki raund natijalari bo'yicha hakamlarning baholari — 3:2 (20:18, 19:19*, 18:20, 20:18, 20:18).

O'z faoliyatida ilk marta jahon chempionatida ishtirok etgan Mirazizbek Mirzaxalilov oltin medalni qo'lga kiritdi. Yuqorida aytilganidek, u hal qiluvchi jangda 3 karra jahon chempionini mag'lub etdi!

Shu tariqa, yana bir bokschimiz Ekaterinburgdagi jahon chempionatida O'zbekiston delegatsiyasi hisobiga ikkinchi oltin medalni keltirdi.

G'alaba muborak! Yana 2 nafar o'zbekistonlik bokschi ishtirokida final janglari kutib turibdi.