Bugun mukofot jamg'armasi 12 000 evro bo'lgan shaxmat festivali boshlandi

Joriy yilning 20-29 sentyabr kunlari Toshkent shahrida 20 yoshgacha bo'lgan yoshlar o'rtasida “MARKAZIY OSIYo ShAXMAT FESTIVALI” bo'lib o'tadi. Mazkur chempionat RosAtom, FIDE va O'zbekiston Respublikasi hukumati ko'magida tashkil qilinib, O'zbekiston Shaxmat Federatsiyasi tomonidan tashkil qilinmoqda.

“MARKAZIY OSIYo ShAXMAT FESTIVALI” doirasida 3 turnir bo'lib o'tadi. Asosiy musobaqa bu 20 yoshgacha bo'lganlar o'rtasidagi Markaziy Osiyo chempionati. Bundan tashqari, rapid(tezkor shaxmat) bo'yicha uch guruhda va maktab o'quvchilari o'rtasida musobaqa hamda FIDE arbitlari uchun xalqaro seminar bo'lib o'tadi.

Musobaqada 6 mamlakatdan – Tojikiston, Qirg'iziston, Turkmaniston, Qozog'iston, Afg'oniston va O'zbekistondan umumiy 200 nafar ishtirokchi qatnashishi rejalashtirilmoqda.

Mukofot jamg'armasi 12.000 evro bo'lgan festivalda, standart yo'nalishida g'olib bo'lgan o'g'il bolalarga 3000 evro, qiz bolalarga esa 1500 evro pul mukofoti beriladi.

Chempionat g'olib va sovrindorlari xalqaro grossmeyster, xalqaro toifadagi sport ustasi va FIDE sport ustasi singari xalqaro unvonlarni olish imkoniyatiga ega bo'ladilar.

Musobaqada o'yin vaqtini nazorat qilib borish uchun elektron soatlardan foydalaniladi.
“MARKAZIY OSIYo ShAXMAT FESTIVALI”da ochilish marosimi 21 sentyabr kuni 12:00 da, 29 sentyabr soat 16:00 da yopilish (taqdirlash) marosimi bo'lib o'tadi.

Federatsiyalarni rivojlantirish dasturi bo'yicha, Afg'oniston, Qirg'iziston, Tojikiston va Turkmaniston shaxmat federatsiyalariga o'z davlatlarida turnirlarni tashkillashtirishlari uchun 20 ta shaxmat soatlari taqdim etiladi.

Ushbu turnir FIDE, O'zbekiston Shaxmat federatsiyasi bilan RosAtom hamkorligidigai ilk turnir.