O'zbekiston futbol assotsiatsiyasi OFKga ishonch uchun minnatdorchilik bildiradi

Xabaringiz bor, Osiyo futbol konfederatsiyasi Prezidenti Shayx Salmon bin Ibrohim al-Xalifa kuni kecha mamlakatimizga tashrif buyurdi. Mazkur tashrif davomida qit'a futbol uyushmasi rahbari O'zbekiston Respublikasi Prezidenti Shavkat Mirziyoev qabulida bo'ldi.

Shayx Salmon bin Ibrohim Al Xalifa Osiyo futbol konfederatsiyasi O'zbekiston bilan keng ko'lamli sheriklikni rivojlantirishda qat'iy ekani hamda amaliy hamkorlikka qaratilgan yangi dastur va loyihalarni birgalikda amalga oshirishga tayyorligini ta'kidladi.

OFK va O'FA o'zaro do'stona munosabatlarining dastlabki boskichlarida 4 yillik qisqa mudlatli va 8 yillik uzoq muddatli xamkorlik strategiyasi ishlab chiqilishi ko'zda tutilgan bo'lib, bu reja bosqichma-boqich tizimli rivojlanishni nazarda tutadi.

Osiyo futbol konfederatsiyasining U-19 Osiyo chempionati mezbonligini O'zbekistonga ishonib topshirishi esa o'zaro ishonchli munosabatlarning natijasi, deb baholash mumkin.

O'zbekiston futbol assotsiatsiyasi mana shunday ishonch uchun Osiyo futbol konfederatsiyasiga minnatdorchilik bildiradi. Shubxasiz, ushbu yirik musobaqa o'zbek futboli nufuzining yanada ortishi, futbol infratuzilmasining yaxshilanishi va muxlislarning futbolga bo'lgan qiziqishini yanada ortishiga xizmat qiladi.  

O'z navbatida O'FA 19 yoshgacha bo'lgan futbolchilar o'rtasidagi Osiyo chempionatini yuqori saviyada tashkil etish uchun bor imkoniyatni safarbar etadi.