“Metallurg” Yangi yil bayrami ta'tiliga chiqdi

24 dekabr sanasidan 2019 yilgi mavsum tadorigini boshlagan Bekobodning “Metallurg” jamoasi futbolchilariga bugundan qisqa muddatli ta'til berildi. Murabbiylar hamda futbolchilar o'z oilalari, ota-onalari bag'rida Yangi yil bayramini kutib olishganidan so'ng, 3 yanvar sanasidan yana Qibraydagi o'quv-mashg'ulot maskanida jamlanishadi.

“Metallurg” jamoasi a'zolari birinchi yig'inni juda faol hamda uyushqoqlik bilan o'tkazishdi. Har kuni murabbiylar shtabi o'yinchilar bilan jismoniy tayyorgarlikni tiklash borasida intensiv faoliyat olib borishdi. Chigilyozdi mashqlari yugurish, to'p bilan ishlash, jismoniy tayyorgarlikni oshirish mashg'ulotlariga ulanib ketdi.

Yig'inning oxirgi kuni jamoa a'zolari ikkiga bo'lingan holda nazorat uchrashuvida kuch sinashib ko'rishdi. Tajribalilar va yoshlar jamoalari bellashuvida mahoratli o'yinchilarning qo'li baland keldi. Asosini yoshlar ligasi jamoasi a'zolari tashkil etgan jamoa a'zolari o'yin oxirida o'z darvozasidan ikkita to'p o'tkazib yuborishdi.

Mashg'ulotlar poyoniga etgach bosh murabbiy Andrey Shipilov jamoaning barcha a'zolarini kirib kelayotgan Yangi yil bayrami bilan samimiy muborakbod etdi. Ularga bayramni oila davrasida maroqli, mazmunli o'tkazib, barcha yaqinlarni bayram bilan tabriklab, ko'tarinki kayfiyatda keyingi yig'inga tashrif buyurishlarini tiladi. “Metallurg” matbuot xizmati