Zohid Karimov: «2018 yil – «Sport» telekanali uchun tarixiy yil bo'ldi»

Sport sohasida ro'y berayotgan voqeliklarni xalqqa etkazishda ommaviy axborot vositalarining roli katta. Milliy olimpiya qo'mitasi yil davomida ko'plab OAVlar bilan hamkorlik qildi. «Milliy sport mukofoti-2018» doirasida o'zini har tomonlama ko'rsata olgan ommaviy axborot vositalari xodimlari ham taqdirlandi.

«Eng yaxshi ijtimoiy rolik» yo'nalishida esa «Sport» telekanali direktori Zohid Karimov mukofotlandi.

«Ortda qolayotgan yil «Sport» telekanali uchun tarixiy bo'ldi. Chunki, biz HD formatga o'tdik. Milliy olimpiya qo'mitasi bilan tizimli hamkorlik o'rnatdik. Buning evaziga bizda musobaqalarni muxlisga voqea joyidan, jonli ravishda etkazib berish imkoniyati paydo bo'ldi. Birinchi navbatda, yuqori saviyada yoritib berilgan Osiyo o'yinlarini qayd etgan bo'lardim.

O'ylaymanki, muxlislarimiz o'zbek sportchilarining Indoneziyadagi g'alabasini, ularning xursandchiliklarini his qila oldilar. Umid qilamanki, ushbu hamkorlik uzoq davom etadi.

Va albatta, kamtargina mehnatimizni ana shunday taqdirlagan Milliy olimpiya qo'mitasiga minnatdorchilik bildiraman. OAV xodimlariga ana shunday e'tibor qaratilayotgani juda yoqimli. Kelajakda bundan ham qattiqroq ish olib boramiz», – dedi Zohid Karimov.