Xarri Keyn: «Penalti ishlash uchun hech qachon simulyatsiya ishlatmayman»

"Tottenxem" hujumchisi Xarri Keyn penalti ishlash uchun hech qachon simulyatsiyaga qo'l urmasligini ma'lum qildi. Eslatib o'tamiz, angliyalik futbolchi "shporlar"ning so'nggi ikkita o'yinida jarima maydoni ichida yiqilib, penalti ishlagan edi.

"Yiqilganim uchun uzr so'rash kerakligi haqida hissiyot hech qachon bo'lmagan. "Nyukasl" bilan o'yinda toza penalti bo'lganini aytgandim. "Arsenal"ga qarshi o'yindan keyin esa vaziyat 50/50 ekanini aytgan edim. Men o'z tanamdan to'g'ri foydalanaman", - dedi Keyn.

Keyn ushbu mavsumda 4ta o'yinda maydonga tushib, 3ta gol urdi. "Tottenxem" 5 ochko bilan APL jadvalida 9-o'rinni egallab turibdi.