Paradzyudochilarimiz Osiyo-Okeaniya chempionatini yuqori notada yakunlashdi

Qozog'istonning Atirau shahrida paradzyudo bo'yicha Osiyo-Okeaniya chempionati o'z yakuniga etdi. Musobaqaning so'nggi kun bahslarida jamoaviy yo'nalishda g'olib va sovrindorlar nomi aniqlab olindi.

Ushbu kun dasturida qatnashgan terma jamoalarimiz finalgacha etib borib, yakunda kumush medal bilan taqdirlandilar. Yigitlarimiz hal qiluvchi bahsda mezbon jamoaga 2:3, qizlarimiz esa xitoylik paradzyudochilarga 1:2 hisobida imkoniyatni boy berishdi. E'tiborlisi, -52 kilogramm vazn toifasida ishtirok etgan Sevinch Salaeva musobaqada “G'alaba uchun iroda” nominatsiyasining g'olibi sifatida taqdirlandi.

Eslatib o'tamiz, terma jamoamiz yakkalik bellashuvlari yakuni bo'yicha 7 ta oltin, 3 ta kumush va 1 ta bronza medallarini jamg'argan edilar. So'nggi kundagi ikki kumush medali bilan hisoblaganda delegatsiyamiz musobaqani umumjamoa hisobida birinchi o'rinda yakunladi.