19 yoshli qiz «US Open» g'olibiga aylandi

AQShning Nyu-York shahrida o'tkazilayotgan "katta dubulg'a" turkumiga kiruvchi US Open turnirida ayollar o'rtasidagi bahslarda chempion nomi aniqlandi. Finalga qadar mezbon tennischi Serena Uilyams va kanadalik Byanka Andreesku etib kelishdi.

19 yoshli sportchi faoliyatida ilk marta "katta dubulg'a"ning finaliga chiqqaniga qaramay, 37 yoshli Serenaga qarshi dadil o'yin namoyish qildi. O'yin boshidanoq u "breyk"ni amalga oshirib, oldinga chiqib oldi va set oxiriga qadar ustunlikni qo'ldan chiqarmadi — 6:3.

Ikkinchi setni Andreesku kuchli o'yin namoyish qilib, hisobni 5:1ga etkazib oldi. O'zi to'pni o'yinga kiritgan geymda matchbolga ega bo'ldi. Ammo tajribali Uilyams qiyin vaziyatdan chiqib ketib, ketma-ket 4ta geymni qo'lga kiritdi — 5:5. Kanadalik sportchi tushkunlikka tushib qolmadi: u dastlab o'z geymini yutib olib, so'ngra Serenaning geymini qo'lga kiritishga muvaffaq bo'ldi — 7:5.

Shu tariqa, Byanka Andreesku faoliyatidagi uchinchi sovrin, birinchi "katta dubulg'a"ni qo'lga kiritdi.

Serena Ulyams ketma-ket 4ta "dubulg'a"ni boy bermoqda. Kecha u juda yomon o'yin namoyish qildi. Ayniqsa, birinchi to'p uzatish aniqligi atigi 44%ni tashkil qildi. AQShlik sportchi majburiy bo'lmagan xatolarga juda ko'p yo'l qo'ydi. Byanka tezlik borasida raqibini ortda qoldira oldi.

«US Open»dagi g'alaba Byankaga 3.850 000 dollar miqdoridagi pul mukofoti hamda 2000 reyting ochkosini taqdim etdi. Natijada u kelasi haftada e'lon qilinadigan WTA reytingida 7-o'ringa ko'tarilib oladi. E'tiborli tomoni shundaki, 2019 yil boshida kanadalik tennischi top-150ga ham kirmagan edi.

Andreesku ushbu yilda ikkinchi marta Serena Uilyamsni mag'lub etdi. Kanadada bo'lib o'tgan "Rogers Cup" finalida bu tennischilar to'qnash kelishgan edi. Birinchi setda Byanka 3:1 hisobida oldinda borayotganida AQShlik tennischi o'z ishtirokini to'xtatishga qaror qilgan.

US Open. Nyu-York, SShA (sovrin jamg'armasi – 57 000 000 dollar)
Ayollar, yakkanlik, final
Byanka Andreesku (Kanada) – Serena Uilyams (AQSh) - 6:3|7:5