2 nafar rapirachimiz “Satellit” turnirida shohsupaga ko'tirildi

Toshkentda start olgan qilichbozlik bo'yicha “Satellit” xalqaro turnirida navbatdagi kun g'olib va sovrindorlari aniq bo'ldi. Ayollar o'rtasida rapira qurolida kechgan bellashuvlarda ikki nafar hamyurtimiz shohsupaga ko'tarildi.

Dastlabki yarim final bahsida Umida Ilyasova rossiyalik Marta Martyanovaga qarshi bahs olib bordi. Tajriba bobida biroz ustun bo'lgan Martyanova 15:2 hisobida g'alaba qozondi va Ilyasova bronza medali bilan cheklandi. Ikkinchi yarim final bahsida hamyurtimiz Yana Alborova italiyalik raqibasini 15:13 hisobida mag'lub etib, finalga yo'l oldi.

Oltin medal uchun bahs Marta Martyanova hamda Yana Alborova o'rtasida kechdi. Murosasiz kechgan bellashuv Martyanovaning 15:11 hisobidagi g'alabasi bilan yakunlandi.

Shu tariqa “Satellit” turnirida terma jamoamiz jamg'argan medallar hozircha 1 ta kumush va 1 ta bronzani tashkil etmoqda. Bugun va ertangi dasturda shpagachilar musobaqa g'olibligi va Tokio Olimpiadasi reyting ochkolari uchun bahs olib borishadi.