Mojaro qayta boshlandi: Neymar va «Barselona» bir-birini sudga berdi

"PSJ" hujumchisi Neymar va "Barselona" bir-biri ustidan sudga shikoyat kiritdi. Bu haqda AS xabar tarqatdi.

Manbaga ko'ra, futbolchi 2016 yilda kataloniyaliklar bilan yangi shartnomaga imzo chekkani uchun 40 million evro miqdorida mukofot puli olishi kerak edi. Ammo u pulning 14 million evrosini olgan. Qolgan 26 million evro futbolchi va uning otasiga to'lab berilmagan. Braziliyalik futbolchi o'sha pulni va 10 foiz miqdorida kompensatsiya olishni istamoqda. Neymar va uning otasi yangi shartnoma imzolanganiga 1 yil to'lishini kutib, 2017 yilning avgust oyida hujumchi "Pari Sen-Jermen"ga o'tib ketdi.

"Barselona" esa boshqacha fikrda. "Ko'k-anorranglilar" rahbariyatining fikricha, Neymar kelishuvga amal qilmagan. Shuning uchun jamoa 27 yoshli futbolchidan 75 million evroni qaytarib olmoqchi.

Bu ish bo'yicha tomonlarning dastlabki fikrini tinglash 27 sentyabr kuni bo'lib o'tadi. Aslida bu ish yanvar oyida ko'rib chiqilishi kerak edi, ammo sud ikki marta keyinroqqa surildi.

Mazkur ish doirasida "PSJ prezidenti Nosir al-Xelayfiy ham guvoh sifatida ko'rsatma berishi kerak. Ammo u avvalroq bergan intervyusida ko'rsatma bermasligini ma'lum qilgan edi.

Eslatib o'tamiz, mazkur yozgi transfer paytida "Barselona" Neymarni jamoaga qaytarishga harakat qildi. Ammo "PSJ" bilan transfer narxi borasida kelisha olmadi.