Gandbolchi qizlarimiz jahon chempionati yo'llanmasini qo'lga kiritishdi

Hindistonning Jaypur shahrida gandbol bo'yicha yoshlar o'rtasida (U-18) Osiyo chempionati o'z yakuniga etib bormoqda. Quvonarlisi, musobaqa O'zbekiston yoshlar terma jamoasi uchun omadli yakunlanadigan bo'ldi. Qizlarimiz musobaqada sovrinli o'rinlardan birini qo'lga kirita olmagan bo'lsalar-da, yurtimizga jahon chempionati yo'llanmasi bilan qaytib kelishadi.

Turnir reglamentiga ko'ra qit'a chempionatidagi eng kuchli 5 terma jamoa kelasi yili Frantsiyada o'tadigan dunyo birinchiligida ishtirok etish huquqini qo'lga kiritadi. Bugun Xitoy Taipeyi yoshlari bilan bahs olib borgan qizlarimiz 33:32 hisobida irodali g'alabaga erishdilar.

Ta'kidlash joiz, bu bilan gadbol bo'yicha O'zbekiston yoshlar terma jamoasi beshinchi marta jahon chempionatida ishtirok etish huquqiga ega bo'ldi.