Azizjon Kamilov Yaponiya MOQ rahbari bilan uchrashdi

Dzyudochilarimiz Tokio tatamilarida o'tayotgan jahon chempionatida ajoyib natijalar qayd etayotganidan xabaringiz bor. Mazkur musobaqani MOQ vitse-prezidenti, O'zbekiston dzyudo federatsiyasi rahbari Azizjon Kamilov ham bevosita Tokiodan kuzatib bormoqda. A.Kamilov musobaqaga tashrifi doirasida Yaponiya MOQ rahbari Yasuxiro Yamasita bilan uchrashdi.

Uchrashuv har ikki tomonning iliq suhbati ostida kechdi. O'z navbatida Azizjon Kamilov JChdan avval dzyudochilarimiz o'tkazgan yig'inning yuqori saviyada kechishida yaqindan yordam bergani uchun Yaponiya tomoniga chuqur minnatdorchilik bildirib o'tdi.

“Avvalo, Maydzuru yig'inini tashkil qilishda yaqindan yordam bergangiz uchun Siz va Yaponiya dzyudo federatsiyasiga o'z minnatdorchiligimni bildirib qolaman. Yig'inning qanchalik foyda keltirgani mana bugun isbotlanmoqda. O'ylaymanki, bunday hamkorlikni yanada mustahkam va bardavom qilish har ikki tomon uchun ham manfaatli. Dzyudo va boshqa sport turlari bo'yicha terma jamoalarimizni Tokio Olimpiadasiga tayyorlash borasida mana shunday qo'shma hamkorlik qilishni O'zbekiston tomoni qo'llab-quvvatlaydi”, – dedi Azizjon Kamilov.

O'z navbatida Yasuxiro Yamasita o'zbek dzyudo maktabining ravnaqi va qudrati haqida iliq fikrlar bildirib, bunday hamkorlikni davom ettirishdan mamnun ekanligini bildirib o'tdi. Uchrashuv yakunida Azizjon Kamilov mana shunday tig'iz vaziyatda suhbat uchun vaqt ajratgan Yasuxiro Yamasitaga tashakkur aytib, esdalik sovg'alarini taqdim qildi.