MOQda ilmiy-metodik markaz faoliyatiga bag'ishlangan matbuot-anjumani o'tkazildi
/ Kiritdi: BestMaster Ko'rilgan: 1427
Ma'lumki, zamonaviy sportda ilm-fanning yutuqlarisiz yuqori natijalar qayd etish juda qiyin. Bu borada terma jamoamiz vakillarining ham jahon va Osiyo chempionatlari, Olimpiadalarda katta natijalar ko'rsatishini ta'minlash maqsadida MOQ qoshida ilmiy-metodik markaz tashkil qilingan. Bugun MOQda ushbu markaz faoliyatiga bag'ishlangan matbuot-anjumani bo'lib o'tdi.
Tadbirni MOQ prezidenti maslahatchisi Nazirjon Xudoyqulov olib bordi. Unda, shuningdek, O'zbekiston fanlar akademiyasi vakili Odilxo'ja Parpiev, Jismoniy tarbiya va sport universiteti prorektori Rashid Matkarimov, markaz olimlaridan biri Lev Yugay ishtirok etishdi. Anjuman boshida so'zga chiqqan Rashid Matkarimov markaz faoliyatining ne chog'lik ahamiyat kasb etishi haqida to'xtalib o'tdi.
“So'nggi paytda sportimizda amaliyot va fan bir-biridan yiroqlashib qolgan edi. Bu markazning tashkil etilishi har ikki sohaning birgalikda faoliyat olib borishiga, sportchilarimizning yanada yuqori natija qayd etishiga ulkan xissa qo'shadi. Bilamizki, zamonaviy sport rivojida ilm-fanning o'rni beqiyos. Shundan kelib chiqqan holda har bir sport federatsiyalariga ilm-fan vakillari biriktiriladi va ular atletlarimizning natijalarini tahlil qilib borishadi. Shu paytgacha 2 federatsiyaga jalb qilingan mutaxassislar o'z izlanishlari bo'yicha dastlabki hisobotni berib ulgurishdi”, – dedi Rashid Matkarimov.
Shundan so'ng o'z sohasining etuk mutaxassislari Lev Yugay va Odilxo'ja Parpiev ham ilmiy-metodik markazning faoliyati qanday bosqichlarda shakllantirilishi, ish sifatini kuchaytirish borasidagi fikrlarini bildirib o'tdilar. Shuningdek, anjuman davomida jurnalistlar o'zlarini qiziqtirgan savollarga ham javob olishdi.