Vadim Abramov: «Tushunmayapman! Hakamga futbolchini haqorat qilishga kim ruxsat bergan?»

Soca Cola O'zbekiston Kubogining chorak finalidan o'rin olgan «So'g'diyona» - «Bunyodkor» (1:2) uchrashuvidan keyin mehmonlar ustozi Vadim Abramov o'z fikrlari bilan o'rtoqlashdi.

- Fikrimcha, bugun muxlislarga yoqadigan uchrashuv bo'ldi. Murabbiylar esa, asabiylashishdi. Avvaliga o'zimizning xato sababli gol o'tkazib ahvolimizni qiyinlashtirdik, lekin keyin vaziyatni o'nglay oldik. Meni tushunmaganim shuki, To'raevga nima sababdan ikkinchi sariq kartochka bilan qizil ko'rsatildi? Bizning foydamizga jarima to'pi belgilanib, bizning o'yinchiga qizil kartochka ko'rsatilyapti. Bu nima? Futbolga yangi qoida kiritilganu, men bilmaymanmi? O'zi To'raevning birinchi sarig'i nima sababdan ko'rsatilganini ham tushunmadim?! Raqib o'yinchisi bizning futbolchiga qo'pollik ishlatyapti, hakam har ikkala o'yinchiga ham sariq kartochka ko'rsatyapti. Jabrlanuvchi sariq kartochka olishi ham futbolning yangi qoidasimi? Qizig'i, To'raev hakamga shu vaziyatni tushuntirmoqchi bo'lgani uchun sariq kartochka oldi. Yana bir gap: hakamga futbolchini haqorat qilishga kim ruxsat bergan? Nega hakam bizning o'yinchini haqorat qiladi? Bu nima degan gap? Yaqinda hakamlar haqida iliq fikrlar bildirgandim, shundan beri hammasi biz uchun teskari ketyapti. Shuni umuman tushunmayapman!?