APL. «MYu» «Vulverxempton» bilan durang o'ynadi, Pogba penaltidan gol ura olmadi (videosharh)

Angliya chempionatining 2-turi doirasida «Manchester Yunayted» safarda «Vulverxempton» mehmoni bo'ldi.

Birinchi turda "Chelsi" ustidan qozonilgan yirik hisobdagi g'alabadan so'ng "MYu" bu safar yaqqol favorit sifatida e'tirof etilayotgan edi. Ular birinchi bo'lim davomida o'yinni nazorat qilishdi, ammo u qadar ko'p vaziyat yarata olmadi. Shunga qaramay, uchrashuvning 27-daqiqasida yaratilgan yagona vaziyatni Antoni Marsial golga aylantirishga muvaffaq bo'ldi.

Mezbonlar ikkinchi bo'limga katta ishtiyoq bilan chiqib kelib, hujumga otlanishdi. 54-daqiqada jarima zarbasidan keyin to'p to'singa tegib qaytdi. Oradan bir daqiqa o'tib esa Ruben Nevesh tomonidan 17 metrdan yo'llangan zarba to'sin orqali to'rga borib tushdi.

Uchrashuvning 67-daqiqasida Pol Pogba jamoadoshi bilan "devor" o'ynab "bo'rilar" jarima maydonchasiga yorib kirdi va penalti ishladi. Futbolchining o'zi 11 metrli jarima zarbasini tepdi, ammo darvozabon to'pni qaytardi.

O'yinning qolgan daqiqalarida Sulsher shogirdlari xavfli vaziyat yarata olishmadi va durang bilan kifoyalanishdi.

Angliya premer-ligasi, 2-tur
Vulverxempton – Manchester Yunayted 1:1 (0:1, 1:0)
Gollar: 0:1 – 27 Marsyal, 1:1 – 55 Ruben Nevesh.
Noaniq penalti: Pol Pogba (68, darvozabon)
Vulverxempton – Ruy Patrisiu, Bennett, Koudi, Boli, Doerti (Traore, 46), Dendonker, Ruben Nevesh, Moutinyu, Kastro, Ximenes (Kutrone, 90), Diogu Jota (Netu, 86).
Manchester Yunayted – De Xea, Uan-Bissaka, Lindelef, Maguayr, Shou, Pogba, Maktomini, Jeyms (Grinvud, 89), Lingard (Mata, 81), Reshford (Pereyra, 89), Marsyal.
Ogohlantirishlar: Jeyms (24), Ruben Nevesh (51), Bennett (67), Uan-Bissaka (84).