La liga. «Barselona» Adurisning supergoli evaziga yutqazdi (video)

Ispaniya chempionatining yangi mavsumiga start berildi. Dastlabki o'yin Bilbao shahrida "Atletik" va "Barselona" jamoalari o'rtasida bo'lib o'tdi.

Basklar o'yinni ancha faol boshlab, mehmonlar darvozasi oldida bir qator xavfli vaziyatlarni yaratishdi. Ammo gol urish uchun eng qulay vaziyatga dastlab kataloniyaliklar ega bo'lishdi. Bahsning 32-daqiqasida "Atletik" himoyachisi to'pni orqaga - o'z darvozaboniga uzatishga qaror qildi. O'sha joyda turgan Luis Suares tayyor "sovg'a"dan foydalana olmadi. Uning zarbasidan keyin to'p ustunga tegib qaytdi.

Oradan ko'p o'tmasdan urugvaylik futbolchi jarohat olib, maydonni tark etdi. Uning o'rniga Rafinya tushirildi. Birinchi bo'lim yakunlanish arafasida "Barsa" futbolchisining zarbasidan keyin to'p bu safar to'singa tegdi.

Ikkinchi bo'limda hududiy ustunlik "ko'k-anorranglilar" tomonida bo'ldi. Ammo g'alaba to'pini kiritish bilbaoliklarga nasib etdi. O'ng qanotdan etkazib berilgan to'pga jarima maydonchasi ichida turgan Aduris qaychi uslubida zarba berdi. Kuchli chiqqan zarbani Mark-Andre ter Shtegen bartaraf eta olmadi. Bu paytda bahsning 89-daqiqasi o'tib borayotgan edi, "Barsa" javob to'pini kiritishga ulgurmadi.

Shu tariqa, Messi maydonga tushmagan, de Yong va Grizmann debyut qilgan uchrashuvda "Barselona" mag'lubiyatga uchradi.

Ispaniya La ligasi, 1-tur
"Atletik" - "Barselona" 1:0
Gol: Aduris, 89 - 1:0
"Atletik": Unai Simon, Nunes, Berchiche, Kapa, De Markos (Sanset, 66), Unai Lopes (Benyat, 81), Raul Garsiya, Muniain, Dani Garsiya, Yeray Alvares, Uilyams (Aduris, 88).
"Barselona": ter Shtegen, Semedu, Langle, Pike, Serji Roberto (Karles Peres, 76), de Yong, Alenya (Rakitich, 46), Dembele, Alba, Grizmann, Suares (Rafinya, 37).
Ogohlantirishlar: Pike (60), Nunes (65).