Poytaxtning 508 mahallalari orasida eng kuchli charm to'p ustalari aniqlandi

Respublikamiz bo'ylab sog'lom turmush tarzi, jismoniy tarbiya va sport targ'iboti yo'lida bir qator samarali dasturlar shakllantirilgan bo'lib, ular yordamida aholining ko'plab qatlamini ommaviy sportga jalb etishga muvaffaq bo'linmoqda. Kecha poytaxtimizda an'anaviy “Charm to'p” musobaqasining final bosqichi o'z yakuniga etdi.

2 avgustda start olgan turnir Toshkent shahridagi 508 mahallaning futbolsevar yigitlari o'rtasida tashkil etildi. Reglamentga ko'ra, musobaqada 18-30 yosh oralig'idagi yoshlar o'zaro bahs olib borishdi. Dastavval, mahalla, so'ng tumanlararo miqyosda o'tkazilgan chempionatda kecha poytaxtimizdagi Bektemir tumanining «Iqbol» va Yunusobod tumanidan kelgan «Otchopar» jamoalari g'oliblik uchun bahs olib borishdi. Keskin va murosasiz kechgan o'yinda Bektemir tumani yoshlari 2:1 hisobida g'alaba qozondi.

Musobaqa yakunida barcha g'olib va sovrindorlar, shuningdek, “Eng yaxshi darvozabon”, “Eng yaxshi himoyachi”, “Eng yaxshi hujumchi”, “Eng yaxshi to'purar” hamda “Namunali jamoa” nominatsiyalari bo'yicha laureatlar tashkilotchilarning qimmatbaho sovg'alari bilan taqdirlanishdi. Shu tariqa, Jismoniy tarbiya va sport vazirligi, Milliy olimpiya qo'mitasi va O'zbekiston futbol assotsiatsiyasi bilan hamkorlikda tashkil etilayotgan mazkur musobaqaning Respublika bosqichiga «Iqbol» jamoasi yo'l oldi. «Charm to'p» turnirining final bosqichi eng ulug', eng aziz bayramimiz arafasida o'tkaziladi. E'tiboringizga final bahsi va taqdirlash marosimidan fotosuratlarni havola qilamiz: