Aleksandr Petrov: «Maqsadimiz — musobaqani g'alaba bilan boshlab, o'zbekistonlik muxlislarni xursand etish»

Kecha kechqurun Toshkent-Bangkok yo'nalishi orqali Tailand poytaxtiga etib borgan AGMK futzal jamoasi ertangi bellashuvga tayyorgarlik doirasida rasmiy tadbirlarda ishtirok etmoqda.

Ertaga Bangkokda bo'ladigan futzal bo'yicha klublar o'rtasidagi Osiyo chempionatiga start beriladi. Mamlakatimizning amaldagi chempioni AGMK musobaqaning "B" guruhida "Tay Son Nam" (Vetnam), "Naft al-Vasat" (Iroq) va "Ar-Rayyan" (Qatar) klublari bilan kurash olib boradi.

Bugun musobaqa oldidan bosh murabbiylar ishtirokida matbuot anjumani bo'lib o'tdi. Quyida olmaliqliklar bosh murabbiyi Aleksandr Petrovning fikrlarini keltirib o'tamiz.

Aleksandr Petrov: "Jamoamiz mazkur musobaqaga jiddiy tayyorgarlik ko'rdi. Osiyo chempionatida kuchsiz raqiblar bo'lmaydi. Guruhimiz ancha jiddiy. Ertangi uchrashuvga faqat g'alabani ko'zlab maydonga tushamiz, jamoamizning ishtiyoqi juda yuqori, o'yinga bo'lgan yondoshuv ham o'zgacha darajada. "Tay Son Nam" jamoasiga qarshi jiddiy kurash kechadi. Maqsadimiz — musobaqani g'alaba bilan boshlab, o'zbekistonlik muxlislarni xursand etish".

Eslatib o'tamiz, ertaga Toshkent vaqti bilan soat 15:00da AGMK futzal jamoasi "Tay Son Nam" (Vetnam) bilan dastlabki tur doirasida bellashadi.