Aleksandr Xomyakov: «Nasaf» bilan ochiq futbol o'ynash — tanklar to'dasiga qarshi borishdek gap»

Coca-Cola O'zbekiston Kubogi 1/8 final uchrashuvidan o'rin olgan “Nasaf” – “Andijon” bellashuvidan so'ng andijonliklar bosh murabbiyi Aleksandr Xomyakov bugungi bahs haqida o'z fikrlarini bildirdi.

"Nasaf"ga qarshi ochiq futbol o'ynash juda qiyin. Ammo biz 1-bo'limda himoyada tartibli o'ynashga harakat qilgan edik. Biz bu ishni qisman uddaladik. Lekin o'z jarima maydonchamiz yonida qoida buzganligimiz bizga qimmatga tushdi.

Ikkinchi bo'limda ham o'z rejamiz asosida harakat qilayotgandik, biroq tezkor gol bizning rejalarimizni buzib yubordi. Hujumda yaxshi harakat qilgan raqibimiz bugun ishonchli g'alabaga erishdi. “Nasaf”ga keyingi bosqichda omad tilayman!", — dedi Xomyakov.