Kurashchi qizlarimizga ofarin, jahon chempionatida yana 2 ta medal!

Bolgariyaning Sofiya shahrida sport kurashlari bo'yicha o'smirlar o'rtasidagi jahon chempionati davom etmoqda. Bugun qizlar kurashida barcha vazn toifalari bo'yicha g'olib va sovrindorlar aniqlab olindi. E'tiborlisi, ushbu kun dasturida yana 2 nafar vakilimiz shohsupaga ko'tarildi.

Har 2 kurashchimiz bronza medali bilan taqdirlanishdi. Ayniqsa, opa-singil Mushtariy hamda Sitora Tolipbekovalarning sovrindor bo'lgani ularning va o'zbek sporti oilasi uchun chinakam bayramga aylandi. Afsuski, -61 kilogramm vazn toifasida Layloxon Sobirova bronza medali uchun kechgan kurashda amerikalik raqibasiga imkoniyatni boy berdi.

-40 kg: Mushtariy Tolipbekova – Alina Kurilenka (Belarus) 4:2
-46 kg: Sitora Tolipbekova – Serena Di Benedetto (Kanada) 10:0
-61 kg: Layloxon Sobirova – Kayli Velker (AQSh) 0:3

Ta'kidlash joiz, bu yosh toifasidagi jahon chempionatlarida O'zbekiston terma jamoasi qizlar kurashi bo'yicha hali bunday muvaffaqiyatli ishtirok etmagan. Sofiya musobaqasi qo'lga kiritilgan 3 ta bronza medali bilan yodda qoladigan bo'ldi. Ma'lumot uchun, bungacha 2015 yilgi dunyo birinchiligida Shahodat Jo'llibaeva mazkur yosh toifasida bronza medali bilan taqdirlangan xolos.