«Real» «Ayaks» hujumchisi bilan kelishuvga erishdi

"Real" klubi "Ayaks" hujumchisi Donni van de Bek bilan shaxsiy shartnoma borasida kelishuvga erishdi. Bu haqda "Marca" nashri xabar tarqatdi.

Manbaga ko'ra, "Qirollik klubi" hozircha amsterdamliklar bilan futbolchining transferi masalasida kelishuvga erishmagan. "Ayaks" kamida 70 million evroga van de Bekni sotmoqchi.

Futbolchining o'zi "Real" tomonidan qiziqish bo'layotganini tasdiqladi.

"Ha, "Real" men bilan qiziqmoqda, barchasi tez rivojlanmoqda", — dedi van de Bek.

Donni van de Bek yakunlangan mavsumda 34ta o'yinda maydonga tushib, 9ta gol urdi va 10ta golga uzatma berdi.