Neymar 5 million evro mukofot pulidan mahrum bo'ldi

"PSJ" hujumchisi Neymar klubdan 5 million evro miqdoridagi mukofot pulini ololmaydigan bo'ldi.

Sport.es tarqatgan xabarga ko'ra, braziliyalik futbolchi FIFAning eng yaxshi futbolchisiga beriladigan "The Best" sovrini uchun da'vogarlarning kuchli o'nligiga kirsa, 3 million evro mukofot olishi shartnomada belgilab qo'yilgan. Ammo Neymar bu ro'yxatdan o'rin olmadi.

Bundan tashqari, 27 yoshli futbolchi ta'tildan keyin "PSJ" mashg'ulotlariga o'z vaqtida etib kelmagani uchun 2 million evrodan mahrum etilgan edi.

Eslatib o'tamiz, Neymar yozgi transfer paytida "Barselona"ga qaytishni istamoqda. U parijliklarning o'rtoqlik o'yinlarida maydonga tushmayapti.