Hikmat Ergashev: "Birinchi bo'limda ham so'nggi 25 daqiqalikdagi o'yinni ko'rsatishimiz kerak edi"

Superliganing 15-turi doirasidagi "Andijon"ga (2:2) qarshi uchrashuvdan keyin jamoamiz yordamchi murabbiyi Hikmat Ergashev o'yin haqidagi fikrlari bilan o'rtoqlashdi.

— Birinchi bo'limda yigitlar kutilgan o'yinni namoyish eta olishmadi. Ikkinchi taymda ketma-ket gollar o'tkazib yuborganimizga qaramasdan futbolchilar o'zlarida kuch topa olishdi va hisobni tenglashtirishni uddalashdi. Buning uchun yigitlarga rahmat. Bekobodda "Metallurg"ga qarshi o'yin bilan solishtiradigan bo'lsak, bugun men birinchi taymdagi jamoani tanimadim.

Birinchi bo'limda jamoaga nima bo'lganini chuqur tahlil qilib chiqamiz. Mashg'ulotlarda futbolchilar yaxshi ishlashmoqda. O'yinning so'nggi 20-25 daqiqasida jamoa anchagina qattiq kurashdi. Uchrashuvning boshidanoq shu tarzda harakat qilishimiz kerak edi. Hisob 2:0 bo'lganidan keyin o'zlarini yo'qotib qo'ymagani, hisobni tenglashtirish uchun o'zida kuch topgani uchun futbolchilarimga rahmat aytaman.