«So'g'diyona» ketma-ket ikkinchi o'yinda g'alaba qozondi
/ Kiritdi: BestMaster Ko'rilgan: 425
O'zbekiston chempionatining ikkinchi davrasini «So'g'diyona» klubi ketma-ket ikkita g'alaba bilan boshladi. O'tgan turda o'z uyida "Lokomotiv"ni mag'lub etgan jizzaxliklar, bugun Qo'qondan g'alaba bilan qaytishdi. "Qo'qon-1912" esa ketma-ket ikkinchi o'yinda mag'lubiyat alamini tortmoqda.
Uchrashuv mezbonlar uchun omadsiz boshlandi. Birinchi daqiqadagi hujum mehmonlarga omad keltirdi. Ivan Nagaev hisobni ochdi. Goldan keyin darhol hujumga otlangan qo'qonliklar raqib darvozasi oldida xavfli vaziyatni yuzaga keltirishdi. 7-daqiqada "Qo'qon-1912" penalti tepish huquqiga ega bo'lishdi. Penaltini esa Murod Xolmuhammedov aniq amalga oshirib hisobni tenglashtirdi.
Hisobni tenglashtirgach, maydon egalari katta kuch bilan oldinga tashlanishdi. Ana shunday hujumlarning birida aniqrog'i, 17-daqiqada "So'g'diyona" posboni jamoasini muqarrar goldan saqlab qoldi. 27-daqiqada mehmonlar jarima to'pi tepish huquqiga ega bo'lishdi. Sanjar Rashidovning jarimadan tepgan to'pi darvoza to'siniga tegib qaytdi. 29-daqiqada Suhrob Berdievning kuchli zarbasini mehmonlar posboni katta qiyinchilik bilan bartaraf etdi. 43-daqiqada Suhrob Berdiev juda qulay imkoniyatdan foydalana olmadi. Uning zarbasi birozgina noaniq bo'ldi. Shu tariqa, jamoalar tanaffusga chiqib ketishdi.
Ikkinchi taymni qo'qonliklar ancha faol boshlashdi. 52-daqiqada jarima maydonchasiga oshirib berilgan to'pni Shahboz Erkinov raqib darvozasiga aniq yo'llay olmadi. 63-daqiqada mehmonlar ikkinchi to'pni kiritishdi. Qarshi hujumlarning birida jizzaxliklar raqib darvozasini ishg'ol etishdi. Jasur Hasanovning uzatmasidan keyin Kaxi Maxaradze to'pni darvozaga joylab qo'ydi.
70-daqiqada mehmonlar uchinchi golni kiritishgandi. Ammo to'p kiritgan futbolchi o'yindan tashqari holatda qolib ketgani bois gol inobatga olinmadi. 72-daqiqada "Qo'qon-1912" ijrosidagi ajoyib kombinatsiya yakuniga etmay qoldi. Ushbu vaziyatda Iqbol Malikjonov raqib jarima maydoni ichida ajoyib o'yin namoyish etganini e'tirof etish lozim. O'yining so'nggi daqiqalarida jamoalarda golga tortadigan ko'plab vaziyatlar yuzaga kelishiga qaramay, hisob boshqa o'zgarmadi.
Coca Cola Superliga, 15-tur
“Qo'qon-1912” – “So'g'diyona” – 1:2 (1:1)
Gollar: Murod Xolmuhammedov (7 pen). - Ivan Nagaev (1) Kaxi Maxaradze (63).
“Qo'qon-1912”: 1. Islom Abdullaev 4.Sobit Sindarov, 7. Jamshid Hasanov (5. Hojimat Erkinov – 62), 10. Quvondiq Ro'ziev (91.Otabek Haydarov – 81), 14. Avaz Mamatxo'jaev, 19. Suhrob Berdiev, 20. Iqbol Malikjonov, 22. Shaxboz Erkinov (11. Timur Hakimov – 70), 23. Aleksandr Merzlyakov, 65. Marko Milich, 70. Murod Xolmuhammedov.
“So'g'diyona”: 27. Milan Mitorovich, 2. Sardor Qulmatov, 4. Elyor Orifov, 5. Kaxi Maxaradze (8. Siroj Meliev – 88), 7. Sanjar Rashidov, 10. Shoxruz Norxonov (11. Izzatilla Abdullaev – 68), 14. Jamshid Boltaboev (97. Shahboz Jo'rabekov – 46), 71. Jasur Hasanov, 88. Ivan Nagaev, 91. Nikola Milinkovich, 92. Sherzod Fayziev.
Hakamlar: Aziz Asimov, Andrey Tsapenko, Timur Gaynullin, G'ayrat Jo'raev.
Nazoratchi: Maksim Nexochin.
Komissar: Jahongir Rahmatullaev.