Temur Kapadze boshchiligida O'FAning murabbiylikka tayyorlov o'quv kurslari bo'lib o'tmoqda

O'zbekiston futbol assotsiatsiyasi malakali murabbiylarni tayyorlash va ularning saviyasini oshirib borishga katta ahamiyat qaratib kelmoqda.

Jumladan, bugundan Toshkentda O'FAning murabbiylikka tayyorlov bo'yicha 4 kunlik o'quv kurslariga start berildi. Jami 18 nafar ishtirokchi qatnashayotgan o'quv kurslarida yaqin o'tmishning mashxur futbolchilaridan Sobir Usmonxodjaev, Dmitriy Kraev, Andrey Povolyaev ham bor ekanini qayd etish joiz.

Mazkur o'quv kurslarini O'FA instruktori Temur Kapadze va Shamil Iseev olib boryapti. Ularga Oybek Davletmurotov yordam bermoqda. O'quv kurslari davomida murabbiylik faoliyatini boshlash arafasida turgan ishtirokchilarga ushbu soha haqida dastlabki ma'lumotlar beriladi. Ular bilan nazariy va amaliy mashg'ulotlar olib boriladi. Mashg'ulotlardan keyin ishtirokchilardan imtihon olinadi.

Imtihonlarni muvaffaqiyatli topshirganlar "C" litsenziyasi uchun o'qish imkoniyatiga ega bo'lishadi.