Aleksandr Xomyakov: «Maydon holati biz xohlagan o'yinni ko'rsatishga salbiy ta'sir ko'rsatdi»

"Andijon"-"Buxoro" jamoalari o'rtasidagi uchrashuv yakuniga etgach, har ikki jamoa bosh murabbiylari ishtirokida matbuot anjumani bo'lib o'tdi.

Matbuot anjumanining ikkinchi qismida "Andijon" klubi bosh murabbiyi Aleksandr Xomyakov savollarga javob qaytardi.

- Avvalo, ushbu g'alaba bilan Andijon halqini tabriklayman! Uzoq kutilgan g'alabani qo'lga kiritdik. Ochiq aytaman, Superligada qolish uchun kurashyapmiz. Shuning uchun biz uchun hozir eng muhimi natija! Qolish uchun kurashayotgan jamoa maydonga chiqib borini berib o'ynashga tayyor bo'ladi. Shuning uchun hozir chiroyli o'yin namoyish etish xaqida o'ylash mavrudi emas. Bugungi o'yin olti ochkolik o'yin edi va unda g'alaba qozonishimiz shart edi. Birinchi taymda oddiy futbol o'ynashga majbur bo'ldi. Sababi, maydon holati biz xohlagan o'yinni ko'rsatishga salbiy ta'sir ko'rsatdi. Asosan uzun paslar bilan o'ynashga harakat qildik, lekin bu urinishlarimiz o'z samarasini bermadi. Ikkinchi bo'limda o'yin balansini ushladik va asosan o'yinni raqib maydonida o'tkazishga harakat qildik. Bir qator vaziyatlar yaratishga harakat qildik va buni uddaladik deb ayta olaman. Qilichevning goli amalda o'yin taqdirini hal qildi. Bunday vaziyatda qanday futbol o'ynashni tushungan futbolchilarimga minnatdorchilik bildiraman. Har bir uchrashuv biz uchun finaldek gap. Qaytarib aytaman, biz maydonga g'alaba uchun halok bo'lishga tayyor holatda chiqamiz.

- "Buxoro" bosh murabbiyi bunday maydonga futbol o'ynab bo'lmasligini ta'kidlab o'tdi. Bu haqda Sizning fikringiz qanday?

- Qaysidir ma'noda u haq. Lekin ikkinchi tarafdan olib qaraganda, kim birinchi bo'lib ushbu maydonga ko'nikib olsa, o'sha jamoa uchun sal engillik bo'lardi. Biz buni uddaladik. Raqib jamoa bosh murabbiyining fikrlariga izoh bildirish... Bu uning fikri. "Buxoro" jamoasi tekis maydonda kombinatsion o'yin namoyish etishni xohlar. Lekin bugungi futbol bizga g'alaba olib keldi.

- Ikkinchi bo'lim boshida "Andijon" hujumkor o'yin namoyish etdi. Nega birinchi taymda shunday o'yin namoyish etilmadi?

- Birinchi bo'limni ozgina noto'g'ri boshladik. Maydon holatidan kelib chiqib, uzun paslar bilan o'ynashga majbur bo'ldik. Qolaversa, raqib maydon markazida uch nafar futbolchi bilan harakat qildi, biz esa ikkita yarim himoyachi bilan o'ynadik. Shu sababli, raqib markazda yaxshi o'ynadi. Ikkinchi bo'limda esa o'yin uslubimizga ozgina o'zgartirish kiritdik, va o'ylagan maqsadimizga etdik.

- Eshitishimizga qaraganda, ayni paytda jamoada moliyaviy muammolar bor ekan.

- Bilasizmi, bu klubning ichki siri. Shu sababli, bunday savollarni bermaganingiz ma'qul. Har bir uchrashuvda g'alaba qozonaversak, vaziyatimiz stabillashib boraveradi, hammasi o'zimizga bog'liq. Lekin, tashkiliy ishlardan va boshqa shunga o'hshash narsalardan stabil holatdamiz, hamma narsa bizni qoniqtirmoqda, hozircha hech narsadan nolimaymiz. Oldinga qadam tashlashda davom etamiz.