«Bunday maydonda futbol o'ynalmaydi» – Muhsin Muhammadiev «Sog'lom Avlod» stadionining holatidan nolidi

Superliga 14-turidan o'rin olgan “Andijon” hamda “Buxoro” o'rtasidagi bahs bo'lib o'tdi. O'yindan keyingi matbuot anjumanining ilk qismida mehmonlar ustozi Muhsin Muhammadiev ishtirok etdi va quyidagi fikrlarni bildirib o'tdi.

- Nima demoqchiman? Bunday maydonda futbol o'ynab bo'lmaydi. Raqibga omad kulib boqdi. Bugun antifutbol guvohiga aylandik. Men o'zimni oqlamoqchi emasman, lekin qaytaraman bunday maydona futbol o'ynab bo'lmaydi.

- Birinchi bo'limda jamoangiz yaxshi o'ynadi, biroq ikkinchi bo'limda raqibga ustunlikni berib qo'ydinglar...

- Ikkinchi bo'limda raqib yaxshi o'ynadi. Ikkita, uchta vaziyatlar bo'ldi, ammo foydalana olmadik. Futbolda vaziyatlar sanalmaydi. Bitta jarima zarbasi o'yin taqdirini hal qildi. Ammo o'yin durangga mos bo'lgandi.

- Maydonning holati sizga manzur bo'lmadimi?

- Ha, bunday maydonda futbol o'ynalmaydi. Bunday maydonda kombinatsion o'yin ko'rsatib bo'lmaydi. Mashg'ulotlardagi o'yinimizni ko'rsata olmadik.

- Matbuot anjumanlarning birida “Buxoro”ning bu mavsumdagi mag'lubiyatlari tugadi degandingiz...

- Ha, men aytagandim. Hozir biz mag'lub bo'ldik, lekin qolgan o'yinlarni yutsak nima deysiz? Bu savol emas-da...

- Bugungi o'yinda bir nechta yangi futbolchilarni ham maydonga tushirdingiz, ulardan ko'nglingiz to'ldimi?

- Qaytaraman futbol yaxshi maydonda o'ynaladi. Bunday maydondagi o'yindan keyin hech narsa deya olmayman. Bugungi o'yinda kurash bo'ldi. Ular o'ynashmadi, kurashishdi. Bir jamoa tepadi, ikkinchi to'pni qabul qilib u ham tepadi. Bu futbol emas. Buni to'pni qabul qilib, yugurish deydilar”, -deya Muhsin Muhammadiev so'zlarini keltiradi Stadion.uz muxbiri Jaloliddin Qobiljonov.