UEFA «PSJ»ning moliyaviy feyr-pley qoidasi buzganini yashirdi

The New York Times gazetasi "PSJ" klubining moliyaviy halol o'yin qoidasini buzganligi haqida maqola e'lon qildi. Nashr UEFA hujjatlari bilan tanishib, shu xulosaga keldiki, tashkilot klub manfaatlaridan kelib chiqib surishtiruv ishlarini olib borgan.

Iv Leterm boshchiligidagi UEFA moliyaviy nazorat bo'yicha surishtiruv palatasi 2018 yilda "PSJ" moliyaviy feyr-pley (MFP) qoidasini buzmaganligi haqida xulosa chiqardi. Mazkur xulosa UEFA moliyaviy feyr-pley qoidasining nazorati bo'limi boshlig'i Xose da Kunya Rodrigesda ishonchsizlik uyg'otgan. Da Kunya hisobotni Letermga qaytargan va ishni boshqatgan ko'rib chiqishni talab qilgan. Bundan tashqari, u Letermning ba'zi xulosalariga shubha bilan qaragan.

Jumladan, homiylik shartnomalari bo'yicha berilgan xulosa da Kunyaga yoqmagan. MFP qoidasiga ko'ra, klublar daromadga nisbatan ko'p xarajat qilishlari mumkin emas. Bunday holat yuz bersa, klubning 3 yil davomidagi byudjet defitsiti 30 mln evrodan oshmasligi kerak. Leterm bergan xulosaga ko'ra esa, «PSJ» katta miqdordagi transferlar va shubhali homiylik shartnomalariga qaramasdan so'nggi 3 yilni bor-yo'g'i 24 million evro zarar bilan yopgan.

Homiylik shartnomalari bo'yicha xulosa chiqarishda Leterm «PSJ» tomonidan jalb etilgan auditorlik kompaniyasi — Nielsen xulosalariga asoslangan.

Surishtiruv palatasining ba'zi a'zolari yakuniy xulosaga nisbatan qarshi chiqqan bo'lsalar-da, «PSJ» foydasiga qaror qabul qilingan.

UEFA qaytadan ish ochmoqchi bo'lgan, ammo Sport arbitraj sudi parijliklarning apellyatsiyasini qanoatlantirdi. Reglamentga ko'ra, qayta ish ochish mumkin emas edi.