O'zbekiston bodibilding, fitnes va mas-restling federatsiyasiga yangi rahbar saylandi
/ Kiritdi: BestMaster Ko'rilgan: 2146
Bugun O'zbekiston Milliy olimpiya qo'mitasida O'zbekiston bodibilding, fitnes va mas-restling federatsiyasining navbatdan tashqari hisobot-saylov konferentsiyasi bo'lib o'tdi. Unda Milliy Olimpiya qo'mitasi prezidenti Rustam Shoabdurahmonov, Jismoniy tarbiya va sport vazirining birinchi o'rinbosari Oybek Kasimov, O'zbekiston bodibilding, fitnes va mas-restling federatsiyasi mutasaddilari, shuningdek, sport jamoatchiligi va OAV xodimlari ishtirok etishdi. Konferentsiyada tashkilotga yangi rahbar va vitse-prezident saylash kun tartibiga qo'yilgan eng asosiy masala edi.
Yig'ilishda dastlab, shu paytgacha federatsiya rahbari sifatida faoliyat olib borgan Dmitriy Adismanning vitse-prezidentlikka o'tishi haqidagi arizasi ko'rib chiqildi. Shundan so'ng federatsiya raisligiga O'zbekiston Respublikasi Prezidentining yoshlar, fan, ta'lim, sog'liqni saqlash va sport masalalari bo'yicha maslahatchisi o'rinbosari Odil Qalandarovich Abdurahmonov nomzodi ovoz berishga qo'yildi. Nomzod Konferentsiya ishtirokchilari tomonidan bir ovozdan ma'qullandi va Odil Abdurahmonov O'zbekiston bodibilding, fitnes va mas-restling federatsiyasining raisi etib saylandi.
Federatsiyaning sobiq rahbari Dmitriy Adisman esa unga o'rinbosar sifatida yordam beradigan bo'ldi.
Yig'ilish doirasida so'zga chiqqan Rustam Shoabdurahmonov va Oybek Kasimov yangi rahbarning faoliyatida omad tilab o'tishdi. Shuningdek, yangi rahbar o'z ishiga kirishar ekan, faoliyati davomida ushbu sportni yangi bosqichga olib chiqish va uni yoshlar orasida yanada ommalashtirishga astoydil harakat qilishini ta'kidlab o'tdi.