OAV vakillari uchun IFABning yangi qoidalari bo'yicha seminar bo'lib o'tdi

Xalqaro Futbol Assotsiatsiyalari Kengashi IFAB mart oyidagi yig'ilishida joriy yilning 1 iyunidan boshlab futbol qoidalariga bir qator o'zgartirishlar kiritilishini ma'lum qilgan edi.

Ushbu qoidalar futbolning jonli devor, golni nishonlash, to'pni o'yinga kiritish, qo'l bilan o'ynash, o'yinchi almashtirish, penalti, bahsli to'p, murabbiyga kartochka ko'rsatish kabi holatlari bo'yicha qabul kilingan.

O'zbekiston futbol assotsiatsiyasi hamda Professional futbol ligasi bayrog'i ostida o'tkaziladigan musobaqalarda ham ushbu qoidalar joriy mavsumning ikkinchi davrasidan e'tiboran amal qilishni boshlaydi. Qoidalarga kiritilgan o'zgartirishlar bo'yicha dastlab milliy chempionatimiz va kubok bahslarida ishlaydigan hakam hamda nazoratchilar, shuningdek, klublar futbolchi va murabbiylari uchun seminar tashkil etildi.

Bugun esa milliy chempionatimizni yoritib boruvchi ommaviy axborot vositalari vakillari uchun ham seminar bo'lib o'tdi. Unda Sport va UzReport telekanallari sharxlovchilari, futbolni yoritib boradigan sayt va gazetalar muxbirlari ishtirok etishdi. Seminar davomida O'FA Hakamlar va nazoratchilar boshqarmasi mutaxassislari ishtirokchilarga qoidalarga kiritilgan yangi o'zgartirishlar xususida batafsil ma'lumot berishdi. OFK instruktori Vladislav Tseytlin tomonidan tayyorlangan taqdimotda videolavha yordamida har bir o'zgartirish bo'yicha to'liq tushuntirish berildi.

Seminar qatnashchilarida yuzaga kelgan savollarga, shuningdek, O'FA Birinchi vitse-prezidenti Ravshan Ermatov ham javob berdi. Kelajakda bu kabi uchrashuvlarni muntazam ravishda o'tkazib borishga kelishib olindi.