MOQ bosh kotibi lavozimidan ozod etildi
/ Kiritdi: BestMaster Ko'rilgan: 621
![](https://futboltv.asia/images/news/shoabdurahmonov-moq.jpg)
Bugun O'zbekiston Milliy olimpiya qo'mitasi majlislar zalida Qo'mitaning navbatdan tashqari XXXVI Bosh Assambleya yig'ilishi o'tkazildi. Unda MOQ prezidenti Rustam Shoabduraxmonov, vitse-prezident Azizjon Kamilov hamda Bosh Assambleya a'zolari ishtirok etishdi.
Yig'ilish kun tartibidan birgina masala o'rin oldi. U ham bo'lsa 2018 yil yanvar oyidan buyon Milliy olimpiya qo'mitasi Bosh kotibi lavozimida ishlab kelgan Jasur Matchanovning o'z hoxishiga ko'ra yozgan arizasini ko'rib chiqishdan iborat edi. Bosh Assambleya a'zolari J. Matchanovning iste'fosini bir ovozdan qabul qilishdi va Jasur Matyakubovich O'zbekiston Milliy olimpiya qo'mitasi Bosh kotibi lavozimidan ozod etildi.
Ta'kidlash joiz, O'zbekistonda xizmat ko'rsatgan sportchi, boks bo'yicha jahon chempionati va Osiyo o'yinlari sovrindori Jasur Matchanov O'zbekiston Milliy olimpiya qo'mitasida 2018 yilning 16 yanvaridan, ya'ni roppa rosa 1 yarim yil davomida Bosh kotib lavozimini egalladi. Uning boshchiligida Milliy olimpiya qo'mitasi xalqaro aloqalarini yanada mustahkamladi.
Shuningdek, Jasur Matyakubovich o'tgan yili Argentina poytaxti Buenos-Ayresda o'tkazilgan III yozgi o'smirlar Olimpiya o'yinlarida O'zbekiston delegatsiyasiga rahbarlik qildi. Aynan mazkur musobaqada O'zbekiston delegatsiyasi o'smirlar Olimpiya o'yinlaridagi o'zining eng yaxshi natijasini qayd etdi. O'zbekiston Milliy olimpiya qo'mitasi Jasur Matyakubovich Matchanovning kelgusi faoliyatida omad va zafarlar tilab qoladi.
O'z navbatida, Milliy olimpiya qo'mitasi Bosh kotib lavozimiga nomzodlarni ko'rib chiqmoqda. Bu masalada yakuniy qaror MOQning navbatdagi Bosh Assambleya yig'ilishida qabul qilinadi. Ya'ni nomzodlar ko'rib chiqilgach, tashkilotga yangi Bosh kotib saylanadi.