Yurgen Klopp kashf etgan 5 ta yulduz

Nemis mutaxassisi «Liverpul» ustoziga aylangach, birin -ketin o'rtamiyona transferlarni amalga oshirishni boshlaydi. Bir qarashda kulguli tuyulgan xaridlar oradan vaqtlar o'tib o'zini to'liq oqladi va murabbiyning naqadar topog'onligini belgilab berdi. Shu kunga qadar «Liverpul» klubi Klopp aytgan bir nechta o'yinchilarni harid qildi va hech birida adashgani yo'q. Bugun Klopp tomonidan amalga oshirilgan eng  omadli haridlar haqida so'z boradi.

Veynaldum

«Barselona» bilan bo'lgan javob bahsining super qahramoniga aylangan gollandiyalik futbolchi «Liverpul»ga o'tishdan avval «Nyukasl» safida APLda jon salqashga urunayotgan futbolchilardan biri edi. To'g'risi, uning eng yuqori darajasi «Nyukasl» klubi bo'lib,  bundan kuchliroq jamoalarning birortasi u bilan qiziqmagan edi. Shunday bo'lsada, Yurgen Klopp futbolchini sotib olishlarini rahbariyatga talab vazifa qilib berdi va uni 27 million evro evaziga o'z jamoasiga qo'shib oldi. Hozirda gollandiyalik futbolchining transfer qiymati 60 million atrofida baholanmoqda. U hozirda ko'hna qit'aning eng kuchli yarim himoyachilaridan biri sanaladi. Janob Kloppning ajoyib topilmasiga qoyil qolmasdan ilojimiz yo'q.

Sadio Mane

«Soutgempton»da o'zining tezligi bilan hammani hayron qoldirgan senegallik Sadio Mane ham Kloppning buyurtmasi ekanligidan xabaringiz bor. Ushbu transferni amlaga oshirishdan avval rahbariyat bu futbolchiga barqarorlik etishmasligini, unda tezlik va jismoniy ustunlikdan boshqa hech qanday qobiliyat yo'q ekanligini qayta-qayta takrorlasada, Klopp shu futbolchini xarid qilish zarur deb turib oladi. «Liverpul» klubi bosslari qaysar murabbiyning talabini bajarishdan boshqa yo'l topa olishmaydi. Klopp Manening to'liq futbolchi bo'lishiga va ochilmagan qirralarini ochishda katta ro'l o'ynaydi va butun dunyoga yangi yulduzni tanishtiradi. Manening transferi 40 million evroga baholangan bo'lsa, hozirda bu futbolchi 125 million evrodan kamiga sotilmaydi. Klopp chaqqon yigitni super yulduz darajasiga olib chiqa oldi.

Endryu Robertson

Shotlandiyalik futbolchi 15 yoshga to'lgan chog'ida «Seltik» klubi u bilan shartnoma imzolashdan bosh tortadi va Robertson Shotlandiyaning 3-dvizionidagi jamoalarda to'p surishni boshlaydi… O'z karierasida tinimsiz qoqilishlarga uchrasada, chekinmagan yigitni Klopp o'z jamoasida ko'rish uchun 9 million evrodan voz kechganida ko'plab mutaxassislar uni ochiqchasiga tanqid qilishga tushib ketishadi. Shunga qaramasdan, Klopp o'z rejasini amalga oshiradi va futbolchini «liverpul»ga olib keladi. Hozirda transfer qiymati 60 milliondan ko'prog'iga baholanadigan qanot himoyachisi o'z ampluasida dunyoning eng kuchli futbolchisi darajasiga ko'tarila oldi. Klopp tomonidan unga bildirilgan katta ishonch o'z so'zini aytdi va Robertson o'z o'yinini yangi darajaga olib chiqishni uddaladi.

Virjil van Deyk

«Soutgempton» futbol klubining etakchisi sifatida APL ning ko'plab klublarni o'ziga qaratgan himoyachi kichik fursat ichida super yulduzga aylanib qoldi…

Darhaqiqat, Klopp himoyani kuchaytirish maqsadida aynan Virjilni tanladi va uni dunyodagi eng qimmat himoyachiga aylanishiga ham qaramasdan Virjilni xarid qildi. O'rtamiyona himoyachi uchun to'langan pullar sababli gollandiyalik futbolchi katta bosim ostida qolib ketdi. Shunday bo'lsada, janob Klopp bu safar ham hammani hayratda qoldirdi. Virjil bu mavsumda APLning eng yaxshi futbolchisi bo'lgan bo'lsa, EChL bahslarida uni hech kim aldab o'ta olmagan ilk himoyachiga aylandi. Mavsum so'ngida esa «oltin to'p» sovrini uchun asosiy da'vogar bo'lib turibdi. Bundan chamasi 2 yo 3 yil ilgari bunday futbolchi bor ekanligi haqida ko'pchilik eshitmagan ham edi.

Muhammad Salah

Londonning «Chelsi» klubidagi juda omadsiz mavsumlardan so'ng tushkun kayfiyatda Italiyaga yo'l olgan misrlik futbolchi uchun Klopp 42 million evro to'lamoqchi ekanligini eshitgan ekspertlar uni tanqidlarga ko'mib tashlashdi. Salahning o'yin uslubi APLga mos emasligi, jismonan baquvvat emasligi va hokazolar bilan Kloppni ko'p tanqid qilishdi.

Jamoaga Salah kelgach ilk mavsumning o'zidayoq uni tanqid qilganlar boshqa efirga chiqa olmay qoldi. Salah bir mavsumning o'zida Messi va Ronaldu darajasida mashxurlikka erishdi va daxshatli sermahsullik namoyish etdi. Ilk EChL finalini erta tark etgan bo'lsada, ikkinchi finalda gol urdi va  jamoasining chempionligi uchun katta hissa qo'shdi. Klopp uni mega yulduz darajasiga olib chiqdi. Bugungi kunga  kelib uning  transfer qimati 150 milliondan ham oshib ketdi. Bu naqd 4 barobar qimmatlashish degani. Yurgen Kloppning topqirligi oldida shlyapamizni echishdan boshqa ilojimiz yo'q!