Asror Aliqulov: «Maydon markazidagi xatolar evaziga mag'lubiyatga uchradik»

O'zbekiston Liga kubogi 2-turi doirasidagi “Navbahor” – “Mash'al” (2:1) jamoalari o'rtasidagi uchrashuvdan keyingi matbuot anjumanining birinchi qismida “Mash'al” bosh murabbiyi Asror Aliqulov ishtirok etib, OAV xodimlarining savollariga javob berdi.

"So'zim avvalida jamoamizga qulay sharoitlarni yaratib, bizni munosib tarzda kutib olgan “Navbahor” klubi rahbariyati va xodimlariga o'z minnatdorchiligimni bildiraman.

O'yin borasida to'xtaladigan bo'lsam, Superliga va Pro-liga jamoalari o'rtasida katta  farq bor. Shu bois, mazkur bahsda qarshi hujumga tayangan holda o'yin tashkil etishni rejalashtirgandik. Qandaydir ma'noda o'z niyatimizga erishdik. Ammo maydon markazidagi xatolar evaziga o'z darvozamizdan 2ta to'p o'tkazib yuborib, mag'lubiyatga uchradik. Shunday bo'lsa-da, shogirdlarim Superliganing etakchi klubidan biriga munosib qarshilik ko'rsata olishdi va bundan xursandman. “Navbahor”ni esa bugungi g'alaba bilan tabriklayman", — dedi Aliqulov.