Asror Aliqulov: «Dinamo» Pro ligada bejizga etakchi emas – o'yinchilar saviyasi va o'yin tomonlama o'tgan yilgidan kuchliroq ko'rindi»

O'zbekiston kubogi 1-turi doirasida Samarqandda o'tgan «Dinamo» - «Qizilqum» (1:0) o'yinidan keyin navoiyliklar bosh murabbiyi Asror Aliqulov jurnalistlar savollariga javob qaytardi.

«Kubok bahslarida yoshlar jamoasidan ham o'yinchilarni jalb qilgandik. Birinchi bo'limda futbolchilar yaxshi o'yin namoyish etishdi, ikkinchi bo'limda sustkashtlikka yo'l qo'ydik. «Dinamo» gol urdi, vaziyatlar yaratdi. O'yin oxirida tarkibda o'zgarishlar qildik, yigitlar yaxshiroq harakat qilishdi. O'yin tomonlama ularga e'tiroz yo'q.

«Dinamo» Pro ligada bejizga etakchi emas – o'yinchilar saviyasi jihatdan ham, o'yin tomonlama ham Samarqand jamoasi o'tgan yilgidan kuchliroqdek ko'rindi. Jamoa o'yini ham mazmunli.

«Qizilqum» 4 kundan keyingi «So'g'diyona»ga qarshi o'yinga tayyorgarlik ko'rgandek tuyuldi? Fikringiz to'g'ri, o'yinchilardagi kartochkalar masalasi ham borligi sababli rotatsiya ham qila olmayapmiz. Bu esa natijaga ham ta'sir qiladi. Kartochkalar sababli ayrim o'yinchilar o'yinni o'tkazib yubordi. Asosiy e'tiborimiz endi Superligadagi navbatdagi raqib - «So'g'diyona»ga qaratiladi», - deydi Asror Aliqulov Samarqanddagi uchrashuvdan so'ng.