Tokiodagi Olimpiya va Paralimpiya o'yinlarini o'tkazish bo'yicha vazir Yoshitaka Sakurada bilan uchrashuv tashkil etildi
/ Kiritdi: BestMaster Ko'rilgan: 16032
Bugun, 24 dekabr kuni Tokioda O'zbekiston MOQning Yaponiyadagi vakili va maslahatchisi Mansur Bahriddinovning Tokio Olimpiya va Paralimpiya o'yinlarini o'tkazish bo'yicha vazir, yapon Parlamenti deputati Yoshitaka Sakurada bilan uchrashuv bo'lib o'tdi. Unda Yaponiyaning Liberal demokratik partiyasi Bosh kotibi Xirotaka Ishixara, sport assotsiatsiyalari va Keyo Universiteti vakillari ishtirok etishdi.
Do'stona ruxda kechgan uchrashuvda tomonlar O'zbekistonda Prezident Sh.M.Mirziyoev rahbarligida amalga oshirilayotgan islohotlar, jismoniy tarbiya va sport sohasida qilinayotgan ishlar, o'zbekistonlik sportchilarning Tokio 2020 Olimpiadasiga tayyorgarlik jarayoni va boshqa masalalarni muhokama qildilar.
Shuningdek, O'zbekiston MOQ prezidenti U. Ahmadjonovning 2018 yil iyun oyidagi tashrifi yakunlari, Keyo Universitetining taniqli sport professori Xiroyuki Ishidaning hamkasbi bilan birga (noyabr oyidagi) Toshkentga tashrifi yakunlari muhokama qilindi.
Y.Sakurada vazir lavozimiga tayinlangunga qadar bir marotaba O'zbekistonga tashrif buyurganini, mamlakatimizga bo'lgan iliq munosabati haqida gapirdi. Vazir Tokio Olimpiadasida O'zbekistonning salohiyati katta ekanligi haqida ta'kidladi. Shuningdek, yapon sporti hisoblangan dzyudo va karate bo'yicha ham suhbatlashildi.
O'z navbatida, Y.Sakurada mamlakatimizga taklif qilindi va Respublikamizda bo'layotgan o'zgarishlar bilan shaxsan tanishishdan mamnun ekanligini izhor etdi. Uchrashuvda vazir O'zbekiston MOQ bilan hamkorlikka tayyor ekanligini ma'lum qildi va yaqinlashib kelayotgan 2019 yil bilan tabrikladi.