Azim Ahmedov: «G'alabali odimni boshlash niyatidamiz»

Sosa Cola Superliga 12-turi doirasidagi “Navbahor” – “Buxoro” klublari uchrashuvi oldidan jamoamizning tajribali yarim himoyachisi Azim Ahmedov fikrlari bilan o'rtoqlashdi.   

- Bizni oldinda “Buxoro”ga qarshi kechadigan juda qiyin o'yin kutib turibdi. Shu bois, bo'lajak bahsga qattiq tayyorgarlik ko'rdik. Garchi yaxshi o'yin namoyish etayotgan bo'lsak-da, so'nggi bahslarda omadimiz kelmay, g'alaba qozona olmayapmiz. Ayniqsa, Olmaliqdagi uchrashuvda tayyor yutuqni qo'ldan boy berganimiz alamli bo'ldi va ushbu natija bois, jamoamiz muxlislarini ranjitib qo'ydik.

Ta'kidlash joizki, “Navbahor”ning ishqibozlari O'zbekistonda yagona hamda biz doimo ularga quvonch ulashish maqsadida maydonga tushamiz.

Xudo xohlasa, buxoroliklar bilan bo'ladigan bahsda AGMKga qarshi kechgan o'yinda jiddiy jarohat olgan jamoadoshimiz Abdujamol Isroilov, shuningdek, bizni doimo qo'llab-quvvatlab turadigan muxlislarimiz uchun maydonga faqat g'alaba ilinjida tushib, ishqibozlarning stadiondan uylariga xursand holda qaytishlari uchun bor mahoratimizni ishga solamiz.

“Buxoro”ga qarshi kechadigan uchrashuvda nihoyat, duranglar seriyasiga chek qo'yib, g'alabali odimni boshlaymiz, degan umiddaman.

Faqat buning uchun muxlislar ushbu o'yinda jamoamizni munosib qo'llab-quvvatlab turishsa bo'lgani. Biz ularning yuzlariga tabassum hadya etish uchun barcha imkoniyatlarimizni ishga solamiz.

“Navbahor” PFK matbuot xizmati.